Ruotâ uáiviminister Ulf Kristersson lii mađhâšâm Uŋgarân já algâttâm teivâdem uáiviminister Viktor Orbánáin. Orbán almostitij viestâpalvâlus X:st kove, kost uáiviministerkyevtis tiervâttáin nubijdis já teevstâ ”Tiervâpuáttim Uŋgarân”.
Uŋgar parlament kolgâččij jienâstiđ Ruotâ Nato-jeessânvuođâ ratifisistmist vuossaargâ. Uŋgar lii majemuš Nato-eennâm, mon ratifisistem Ruotâ jeessânvuotâ suáldátlittoost ain vuárdá.
Orbán povdij uđđivemáánust ruátálii pargoskipáris Uŋgarân huksiđ luáttámuš já jieŋâlmittiđ pooliitlii savâstâllâm. Kristersson vaaldij vuástá povdim mut ij tuhhiittâm jurduu, et kolliistâllâm ääigi vala savâstâlluuččij Ruotâ Nato-jeessânvuođâst teikâ Uŋgar iävtuin toos. Ruotâ mield savâstâlmeh kyeskih enâmij koskâsii piäluštem- já torvolâšvuotâohtsâšpaargon já meiddei Uŋgar kuuđâ mánuppaje kukkosii EU-saavâjođetteijeeäigipajan, mii lii älgimin syeinimáánust 2024.
Ruotâ uusâi Nato-jeessânvuođâ siämmáá ääigi Suomáin. Suomâst šoodâi Nato tievâjeessân 10 mánuppaijeed tassaaš, cuáŋuimáánu 4. peeivi 2023.
Käldeeh:
– Ruotsin Kristersson tapaa Unkarin Orbanin – Ruotsin Nato-jäsenyyden ratifiointi loppusuoralla (www.is.fi)
– Council Decision (EU) 2016/1316 of 26 July 2016 (www.consilium.europa.eu)
Kove: Ninni Andersson/Government Offices of Sweden