Italialâš rock-muusikjuávkku Måneskin puátá vuosmuu tove Suomân puáttee keesi. Muusikjuávkku láávdást Seinäjokist Provinssi-festivaalist kesimáánu 27. peeivi. Muusikjuávkku lii makkuuttâm keččeid pirrâ maailm, já sii lávdástem lii tuođâi vuordum. Taan muusikjuávkun kuleh lávloo Damiano David, basist Victoria de Angelis, kitarist Thomas Raggi já rumbal Ethan Torchio.
Måneskin lasseen Provinssi-festivaal ohjelmist láá ovtâstumstaatâlâš Turnstile, jaapaanlâš Hanabie sehe syemmiliih Maj Karma, Ursus Factory, Ida Paul & Kalle Lindroth, Tuure Kilpeläinen, Jesse Markin já maaŋgah eres-uv muusikjuávhuh. Festivaal áigu almottiđ lase artistijd maŋeláá kiđđuv.
Måneskin vuoitij ive 2021 Sanremo muusikfestivaal já peesâi ovdâstiđ Italia Euroviisuh-lávlumkiišton Rotterdamân. Juávkku vuoitij Euroviisuid pittáin ”Zitti e buoni”. Pitá nommâ meerhâš ”joskâdávt já nánnáht”. Taat pittá finnij ohtsis 524 čyegisid.
Lávlumjuávkku lii almostittám kyehti studioalbum: Il ballo della vita (2018) já Teatro d’ira – Vol. I (2021). Tot lii meid almostittám oovtâ kuhessuáitu já love singled. Juávkku lii finnim 28 platina- já 7 kollesertifikaatid FIMIst (Federation of the Italian Music Industry). Tot lâi jo kiergânâm vyebdiđ Italiast paijeel miljovn skiärrud ovdil Euroviisui.
Krista Nupponen
Käldee:
– Måneskin saapuu vihdoin Suomeen – Provinssi julkisti uusia lisäyksiä ja päiväkohtaisen esiintyjäjaon (www.soundi.fi)
Kove: Sven Mandel (Wikimedia Commons)