Loddeservi BirdLife uárnee Šiljoboŋŋam (su. Pihabongaus) -tábáhtume uđđâivemáánu 27.–28. peeivi. Šiljoboŋŋam lii Suomâ stuárráámus loddetábáhtume. Tot uárnejuvvoo taan ive jo 19. keerdi. Taan tábáhtumán kii peri puáhtá uásálistiđ keččâmáin luudijd oovtâ tijme ääigi jieijâs šiljoost teikkâ mottoom eres saajeest.
Šiljoboŋŋam-tábáhtume ulmen lii movtáskittiđ ulmuid čuávvuđ tom, mii puoh tábáhtuvá pääihi alda leijee luándust já magareh lodeh kávnojeh tälviv loddelyevdist já táálu šiljoost. Kii peri puáhtá uásálistiđ tábáhtumán. Koččâmušâst ij lah kišto, pic tehálumos äšši lii uásálistiđ já almottiđ, magarijd já mon ennuv luudijd lii uáinám. Tábáhtume puátusijn šaddeh teháliih tiäđuh Suomâ tälviáigásijn loddenaalijn já tai nubástusâin. Tondiet lii-uv tergâd almottiđ luudijd, moh láá oinum oovtâ saajeest eidu oovtâ tijme ääigi. Nuuvt almottâsâin šoddâm jieškuuđij-uv iivij amnâstuvâid puáhtá viärdádâllâđ koskânis. Meiddei tot lii mávsulâš tiätu, et ij lah uáinám oovtâgin lode tijme ääigi, teikkâ tuše muáddi táválii lode láá oinum, já tom-uv kannat almottiđ. Kuássin ij pyevti tiettiđ, mon loddešlaajâ nääli ucco teikkâ stuáru puátteevuođâst já moos taat tiätu motomin máhđulávt tarbâšuvvoo.
Jis tun halijdah uásálistiđ Šiljoboŋŋam-tábáhtumán, te taa láá ravvuuh:
- Čuávu oovtâ tijme ääigi luudijd jieijâd šiljoost teikkâ eres mudágâš saajeest uđđâivemáánu majemuu oholoopâ jo-uv lávurduv tâi pasepeeivi.
- Tuubdâ loddešlaajâid, maid tun lah uáinám.
- Luuvâ, kalle lodded uáináh enâmustáá tiätušlaajâst siämmáá ääigi (návt jieh luuvâ vahâgist siämmáá lode maŋgii).
- Almoot luudijd luámáttuvváin, mii kávnoo BirdLife-siijđost, majemustáá vástuppeeivi 2.2.2024. Lii meid máhđulâš almottiđ luudijd BirdLife-siärván postâkorttáin.
- Almoot luudijd oovtâ saajeest tuše ohtii (ađai ij sehe lávurduv já pasepeeivi).
- Almootmáin luudijd tun puávtáh uásálistiđ meid vuárbumân.
Šiljoboŋŋam-tábáhtume lii uárnejum Suomâst ive 2006 rääjist ain uđđâivemáánu majemuu oholoopâ. Ive 2023 toos uásálistii paijeel 24 000 olmožid masa 16 300 saajeest pirrâ Suomâ.
Käldee:
– Pihabongaus (www.birdlife.fi)
Kove: Erik Karits (Pixabay)