Tuorâstuv 21.12.2023 maailm hirmástui, ko Kaarle ollâopâttuv uáppee paajij ulmuid filosofisii tieđâkode táálust Prahast. Tábáhtusâst 15 olmožid ruáppánii já 25 olmožid karttii pyecceiviäsun haavij keežild. Maaŋgâin ulmuin, kiäh lijjii pääihi alne tábáhtus ääigi, láá tääl post-traumaatlii stressihemâdâs symptomeh.
Poolis uážui koskâpeeivi maŋa tiäđu, et 24-ihásâš historjá uáppee David Kozák áigu surmiđ jieijâs. Poolis usâškuođij suu. Suu aassâmsaajeest poolis kaavnâi uáppee eeji, mut sun lâi jáámmám. Talle poolis ij vala tiättám, et eidu Kozák lâi surmim jieijâs eeji. Poolis luhostui sajostittiđ uáppee puhelin Celetná kááđu alda, kost uáppest lâi meiddei forgâ älgimin oppâtijme. Poolis evakuistij filosofisii tieđâkode táálu Celetná kááđust já uusâi uáppee. Sun ij kuittâggin lamaš tobbeen, tastko sun lâi moonnâm ollâopâttuv nube táálun Jan Palach torin. Tot lii suullân kilomeetter keččin táálust, mon poolis lâi evakuistmin. Pääččim aalgij tijme 14.59. Poolis poođij sajan viiđâ miinut siste. Päččee surmij jieijâs talle ko poolis aldanij suu, já pääččim nuuvâi tijme 15.20.
Tábáhtusâst ruáppánáin kyehti ollâopâttuv pargee: musikologia lágádâs hovdâ Lenka Hlávková já syemmilii kirjálâšvuođâ máttáátteijee já totkee Jan Dlask. Päčimist jammii meiddei 12 uápped. Vittnubálovváád uhre lâi päččee jieš.
Tšekki uážui maaŋgâid viestâid olgoenâmij jođetteijein, et sij väldih uási murrâšân já fäälih iše. Filosofisâš tieđâkodde meridij juátkiđ máttááttâs luuhâmpaje loopâ räi já kulluuttij, et taan iskospaje iskoseh láá iävtutátuliih. Ollâopâttâh meiddei nurâškuođij ruuđâid uhrij perrui, uáppei já ollâopâttuv pargei várás. Ruttânurâmân láá jo uásálistám paijeel 41 000 olmožid, kiäh láá skeŋkkim ohtsis paijeel 51 miljovn ruvnâd (suullân 2 miljovn eurod).
Kyehti oho tábáhtus maŋa 4.1.2024 ollâopâttuv uáppeeh uárnejii uhrij muštotilálâšvuođâ. Sij rahtii olmoošvitjá táálu pirrâ, já toin naalijn sij solâstii tom. Solâstem maŋa ulmuuh cokkiittii muštotuulâ, mii puálá oovtâ mánuppaje. Loopâst láávlui uáppei lávlumjuávkku. Uáppeeh halijdeh čäittiđ maailmân, et sij láá soroliih já šookist, mut et siämmást sij rähisteh ollâopâttuv já oskoh ton puátteevuotân. Taat kavhâdis tábáhtus ij pyevti mutteđ tom.
Käldeeh:
– Pomoc zasaženým tragédií na FF UK (www.darujme.cz)
– Česko halí státní smutek (www.novinky.cz)
– Tisíce lidí po průvodu objaly fakultu. Na náměstí byl zapálen památný oheň (prazsky.denik.cz)
Kove: Šafránek je autorem (Wikimedia Commons)