Kuobžâ- já čäcilodde­pivdo älgih onne

Kuobžâpivdo aalgij onne tállân koskâiijâ maŋa. Čäciluudijd uážžu pivdeđ tijme 12 maŋa.

Kuobžâid uážžu oppeet pivdeđ puásuituálukuávlu máddáábeln ive 2023 maŋa. Suomâ pivdoelleekuávdáš lii mieđettâm ohtsis 182 spiekâstâhloppeed kuobžâpiivdon čoohčân 2026. Spiekâstâhluuvij ulmen lii härvidiđ já raijiđ kuobžânaalij lasanem já toin naalijn estiđ kuobžâi tovâttem riiskâid já vahâgijd.

Suomâ pivdoelleekuávdáš táttu pivdein máášu kuobžâpiivdon.

– Mun tuáivum, ete pivdeeh kuorâtteleh tárkká tom, magarijd ovtâskâs elleid sij pivdeh. Pivdemáin ličij pyeri viggâđ meddâlistiđ eromâšávt tagarijd ovtâskâs elleid, moh láá vuáhádum jotteeđ ulmui aassâmsoojij aldasijn, Kainuu pivdoelleehovdâ Marko Paasimaa iätá.

Puoh spiekâstâhluuvijn 118 mieđettuvvojii Tave-Kärjilân. Maadânuorttâ-Suomâst uážžu koddeđ 24 kuobžâd, Maadâ-Savost 14 kuobžâd, Kainuust oovce kuobžâd já Tave-Savost käävci kuobžâd. Koskâ-Suomâst spiekâstâhloveh láá oovce.

Luánduriggodâhkuávdáá áárvu mield Suomâst puásuituálukuávlu ulguubeln iälusteh ohtsis 2 201–2 962 kuobžâd taan čoovčâ.

Puásuituálukuávlust uážžu pivdeđ 85 kuobžâd

Eennâm- já meccituáluministeriö nonnim kuávlulij pivdomeerij mield puásuituálu­kuávlust uážžu pivdeđ ohtsis 85 kuobžâd 20.8.–31.10.2026.

Nuorttiibel puásuituálukuávlust, moos kuleh Ucjuuvâ, Aanaar, Suáđigil, Pelkosnjaargâ, Suovâkuoškâ, Salla, Kuáccám já Suomussalmi kieldah, pivdomeeri lii 70 kuobžâd. Viestârpel puásuituálu­kuávlun kuleh puoh eres puásuituálu­kuávlu kieldah, já ton pivdomeeri lii 15 kuobžâd.

Kuobžâpiivdo ulmen lii kepidiđ vahâgijd, maid kuobžah tovâtteh puásuituálun.

Čäciluudijn kalga pivdeđ eromâšávt tagarijd šlaajâid, moi näälih láá stuárráh

Onne tijme 12 rääjist uážžu pivdeđ tuáršu, čiivšâ, čuáđgi, syeiničiivšâ, snarttâl, vuonnjâš, kubdânjunvuonnjâš já uccâviettuužii. Áŋáluv, kuussâgkuálsi já koskkuálsi miäcástempaje álgá syeinimáánu vuosmuu peeivi.

Merâčuánnjáá já kanadačuánnjáá pivdem piälduin aalgij jo porgemáánu 10. peeivi, já onne tijme 12 rääjist taid uážžu pivdeđ meiddei ávusčaasijn.

Suomâ pivdoelleekuávdáš muštoot, ete maaŋgâi šlaajâi pessimnäälih láá kiäppánâm Maadâ-Suomâst já tondiet meiddei pivdein lii ovdâsvástádâs naalij killeelvuođâ suoijâlmist.

– Pivdeđ kalga eromâšávt tagarijd šlaajâid, moi näälih láá stuárráh, ađai tuáršu, čiivšâ já čuáđgi, Pohjanmaa pivdoelleehovdâ Mikael Luoma muštoot.

Käldeeh:
– Karhunmetsästys alkaa 20. elokuuta – poronhoitoalueen eteläpuolella pyyntiin parin välivuoden jälkeen (riista.fi)
– Vesilintujen metsästys alkaa 20. elokuuta – kohdenna metsästys runsaisiin lajeihin ja muista pelisäännöt (riista.fi)

_{Artikkâlkove: Frank Vassen (CC BY 2.0 / Wikimedia Commons)}