Uđđâivemáánust Aanaar škoovlâst uárnejuvvoo šiljosählyturnam. Turnaamist kištotteleh škoovlâ máttáátteijeeh sehe viiđâd-, kuuđâd-, čiččâd-, káávcád- já oovcádluokkaliih. Aanaar škoovlâ máttáátteijeeh láá jo kuhháá ornim aktiivlávt valastâllâmtábáhtusâid, main uáppeeh kištotteleh máttáátteijei vuástá. Moonnâm luuhâmive škoovlâst uárnejuvvojii kištoh suundedmist, jyelgipáálust já jieŋâskiärust. Iivij ääigi fáárust láá lamaš meiddei pesipállu, čuoigâmviestâ já kooripállu.
Šiljosählyturnam já škoovlâ eres valastâllâmtábáhtusâi tyehin lii Ailu Näkkäläjärvi. Sun ana ohtâsâš speelâin tehálâžžân eromâšávt škoovlâ juávkkuvuoiŋâ. Tehálâš lii meiddei porgâđ oovtâst já lihâdiđ.
– Taat šiljosähly iärrán eres speelâin tast, ete taat lii olmâ turnam. Eres speelah láá ovtâskâs speelah, main uáppei juávkku spiällá máttáátteijei vuástá. Mutâ amahân taan-uv turnaamist lii ”uáppeeh vuástá máttáátteijeeh” -meeinig fáárust, paahud Näkkäläjärvi.
Spellâmäigi lii räijejum tijmekooskâ mield, já tondiet speelah pišteh 10 minuttid. Tuámárin väljejuvvoo ohtâ uáppee valjimlihâdem juávhust. Oovtâ peeivist lii tárguttâs spellâđ oovtâ teikâ kyehti speelâ.
Turnam peesâi joton moonnâm oho vuossaargâ. Vuosmuš spellâ – máttáátteijeeh oovcádluokkalij vuástá – spellui putes tälviááimust. Šoŋŋâ lâi tijpâlâš uđđâivemáánu šoŋŋâ: -20 cekkid já kirkes peivi. Oovcádluokkaliih vuottii máttáátteijeid molâiguin 2–0.
Koskoho viiđâdluokkaliih spellii čiččâdluokkalij vuástá. Spellâ nuuvâi čiččâdluokkalij vuáitun. Viiđâdluokkalij juávhust speelâi meiddei Jose Hautala, kiän mielâst ohtâ suotâs äšši tain speelâin lii tot, et fáárust láá ennuv ulmuuh. Sähly lii sunjin uápis valastâllâmšlaajâ já ohtâ puoh mielâsumosin, main uáppeeh kištotteleh ive ääigi. Koččâmušân vyeitteeiävtukkâsâst sun västid várugávt: ”kenski čiččâdluokkaliih”.
Máttáátteijee Maijukka Pyykkö osko, ete maŋgâsân lii kunneeäšši peessâđ spellâđ já vyeittiđ. Turnaamist sehe eres kištoin já speelâin sun ana tehálâžžân, ete máttáátteijeeh já uáppeeh peesih viettiđ ääigi oovtâst luoka seeinij ulgguubeln.
– Tággáár astoäigihommá uáppei já máttáátteijei kooskâst, mii ij lohtuu máttátmân, lii uáli jo tehálâš, já liihân tot ereslágán pargopeivi, ko piäsá jieš-uv lihâdiđ, lasseet Pyykkö. Sun jieš lii ráhtádâttâm spelláid vyejimáin pyeráin škoovlân já mudoi-uv liihâdmáin.
Turnam juátkoo vala uđđâivemáánu loopâ räi, kuás turnam vyeittee čiälgá.
Kaisa Tikka-Morottaja
Koveh: Kaisa Tikka-Morottaja