Äimisäpligij meeri lii kiäppánâm Suomâst uáli jotelávt. Ohtân suijân toos láá roobootsinočyeppeeh. Satakunta elleisuojâlemservi tieđettij, et moonnâm ive ulmuuh puohtii tipšo tarbâšeijee äimisäpligijd eenâb ko kuássin ovdil. Moonnâm ive vyesimáánu loopâ räi seervi tiipšon pessii jo 12 äimisäpligid, veik táválávt tipšoost ij lah ohtâgin äimisäplig ive aalgâst.
”Motomeh sinočyeppeeh kuárŋuh äimisäpligij oolâ já silppoh taid. Ulmuuh puohtii mijjân äimisäpligijd, moin láá njalanâm säägih já liške. Lii meiddei keevvâm nuuvt, et äimisäpligeh láá skainâšum, toi täävtih láá morrum teikkâ toi njune lii havvâšum,” muštâl Satakunta elleisuojâlemseervi stivrâjeessân Tanja Harmaajärvi.
Äimisäpligeh iä kárgáá ko lii várálâš tile, peic toh vierih já šaddeh pállun. Äimisäpligij säägih suojâleh taid, mut säägih iä orostit roobootsinočyeppeid.
Totkee Sophie Lund Rasmussen já suu tutkâmjuávkku láá tutkâm tom, mii tábáhtuvá talle ko äimisäpligeh pääcih roobootsinočyeppei vuálá. Tutkâmušâst sij láá kiävttám jo jáámmám äimisäpligijd. Motomeh sinočyeppeeh skäinejeh äimisäpligijd tuše váhá, mut motomeh silppoh taid uccâ pitážin.
Tutkâmjuávkku lii valmâštâm äimisäplignuke, mon puáhtá printtiđ 3D-printteráin. Sij láá meiddei ráhtám torvolâšvuotâteestâ, mon roobootsinočyeppei valmâšteijeeh pyehtih kevttiđ rijjâ. Jis roobootsinočyeppee čođâldit teestâ, te tot lii torvolâš äimisäpligáid já tom puáhtá markkânistiđ äimisäpligustevlâžžân.
Ohtâ vyehi suojâliđ äimisäpligijd lii meiddei čuoppâđ sino peiviv, tastko äimisäpligeh lihâdeh iho. Äimisäpligeh poreh tiivrijd, ađai lii pyeri, jis šiljoost láá maaŋgâlágáneh šadoh, nuuvt ete äimisäpligeh uážžuh tuárvi ennuv purrâmuš. Čohčâ- já roovvâdmáánust puáhtá faallâđ äimisäpligáid lase purrâmuš, ovdâmerkkân kisá teikkâ pennuu purrâmuš. Mielhi vuod ij kannat faallâđ.
Käldeeh:
– Robottiruohonleikkureista vaaraa pienille eläimille – Eläinsuojeluyhdistys: ”Tullut ihan älytön määrä loukkaantuneita siilejä” (yle.fi)
– Siilien suojeluun uusi työkalu: 3D-printattava törmäysnukke testaa robottiruohonleikkurien ”siiliystävällisyyttä” (yle.fi)
– Kotipihoilla juoksee tulevaisuudessa yhä vähemmän siilejä – Näillä vinkeillä voit auttaa siilejä (wwf.fi)
Kove: Bence Kis (Pixabay)