Uđđâivemáánu lii älgimin eromâš kolmâsin. Meteorolog Aleksi Jokela čielgee MTV uđđâsij šoŋŋâtiäđáttâsâst, et šoŋŋâkártái tevkkâdumos ivnegin ij innig pijsáá korrâ puolâšij kuvviimân.
Sun čielgee, et ive vuosmuš okko sáttá leđe joba 20 cekkid kolmâsub ko táválávt, tastko áimuvirdeh puátih Suomân Siberia kuávlust. Sun iätá, et maadâ-Suomâst algâohhoost sättih leđe 30 ceehi puolâšeh. Tave-Suomâst lii máhđulâš, et puolâš ličij joba alda 50 cekkid. Jokela iätá, et tuođânálásâš liegâsvuotâ čiälgá kuittâg esken maŋeláá:
– Ennuv lii kiddâ tast, mon polvii talle lii, já meid piegâi sundeest. Jis piegâ jorgeet tavas, te tot tiätá pivvâlub šooŋâ.
Foreca meteorolog Ilkka Alanko ij aaibâs monâččii 50 ceehi puolâšáid, mut iätá kale, et kolmâsub šadda ko -30 cekkid. Sun iätá, et kolmâsumos peivi lii koskoho, kuás puolâš lii aldasáid 30 cekkid maadâ-Suomâst-uv, já koskâ- já tave-Suomâst vala kolmâsub. Sun še noomât muttuustâllee äššin polviivuođâ, mii vaaigut puolâšáid.
50 ceehi puolâšeh lijjii Suomâst ive 1999 aalgâst. Talle Kittâl Pokkaast mittedui puoh aigij puolâšulâttâs Suomâst, mii lâi -51,5 cekkid. Aanaar kuávlust šleeđgah potkânii maaŋgâ tiijmán, já čäcipocceeh jieŋŋuu. Meiddei autoh já rekah jieŋŋuu luodâ oolâ, já moottorkiälháigijn lijjii vädisvuođah. Anarist lâi jo valmâšin evakuistemvuávám ton várás, jis šleeđgah iä liččiigin maccâm.
Käldeeh:
– Sääkartalta loppuvat värit kesken: Lähes 50 asteen pakkaset mahdollisia ensi viikolla! (www.mtvuutiset.fi)
– Siperian arktinen kylmyys iskee Suomeen – animaatio näyttää hyytävän vyöryn (www.is.fi)
– Muistatko tämän? 22 vuotta sitten kärvisteltiin yli 50 asteen pakkasissa Lapissa: ”Autot ruikkivat nesteitä, sähköt poikki Inarissa” (www.lapinkansa.fi)
Kove: Fabrizio Brecciaroli