Tullâvääri lii rusoškuáttám Islandist

Tullâvääri ruso Islandist, muštâl Island áimutiettuu lágádâs. Taan russoom keežild enâmân lii kulluuttum etitile. Russoomsaje lii mottoom love kilomeetterid máádás Island uáivikaavpugist Reykjavikist. Reykjavik almugijkoskâsâš kirdemkieddi lii ain áávus. Kirdemfinnodâh Icelandair muštâl, et russoom ij kuittâg tääl val vaaigut kirdemäigitavluid. Kirdemfinnodâh čuávu tile tárkká.

Tullâvääri rusoškuođij majebargeehid love ääigi páihálii ääigi. The Guardian muštâl, et ovdil russoom älgim kuávlust vuáttojii eennâmtuárgástusah. Island áimutiettuu lágádâs muštâlij, et russoom lii jo josijduumin.

Laava kolgá luoddânmist eennâm asan nyevt 100–200 kuđâhâšmeetterid sekundist, mii lii maaŋgâkiärdásâš meeri, jis tom verdid Reykjanes njaargâ ovdebáid rusomáid majemui ivij, muštâl Island áimutiettuu lágádâs.

Koskiijâ páihálii ääigi arvâlui, et luoddânem lii suullân neelji kilomeetter kukkosâš. Island áimutiettuu lágádâs Kristin Jonsdottir muštâlij Island radio Ríkisútvarpiðân, et lii väädis arvâliđ, mon kuhháá russoom piištiš.

– Kievrâvuođâ já luoddânem stuáruduv vuáđuld lii vyerdimist, et tot pištá kuhheeb ko kulmâ oho, sun eeđâi.

Jonsdottir mield rusomeh láá táválávt kievrâmuuh eidu talle ko toh älgih.

Grindavik pormiäštár Fannar Jonasson mield russoomsaje ij lam olâttâs.

– Totkei mield taat saje lâi puoh tuođânálásumos. Russoom äigi kale lâi olâttâs, tastko tile lâi jo josijduumin. Magma intruusio Grindavik vyelni ij lam innig aktiivlâš, já tot lâi korâškuáttám, Jonasson muštâlij Ríkisútvarpiðân.

Kuávlu páihálâš poolishovdâ Ulfar Ludviksson lii vises, et Grindavikist teikâ ton aldasijn leijee Svartseng vyeimilágádâsâst iä lah lamaš ulmuuh talle ko tullâvääri rusoškuođij, radio Ríkisútvarpið muštâl.

Virgeomâhâsah láá poollâm russoom älgimist Reykjanes njaargâst jo maŋgâ oho. Reuters mield Grandavik kaavpugist evakuistojii tolebiššáá skammâmáánust suullân 4 000 ässed. Meid eennâm tuuriistsaje Blue Lagoon -lávguttâh kiddejui.

Laavavirdeh sättih kulgâđ kuárosin leijee riddokaavpug oolâ. Radio Ríkisútvarpið lii sahhiittâllâm vulkanolog Armann Höskuldsson, kiän mield luoddânem oro kuittâg čulgâmin laava tavaskulij, ko vist Grindavik lii russoomsaje máddáákeččin.

Maaŋgah eennâmtuárgástusah Islandist láá pieijâm magma joton. Island maadâviestârpeln láá tubdum eennâmtuárgástusah jo maŋgâ oho. Island lii kyevti nubijnis iäráneijee nannaamrááptu kooskâst. Euraasia já Tave-Amerik rááptuh maneh nubijnis olgoláá ain mottoom seenti ivveest, mon keežild Islandist tábáhtuveh eennâmtuárgástusah já tullâvarij rusomeh.

Käldee:

– Pelätty hetki koitti: Tulivuori alkoi purkautua Islannissa – paikallinen sai huolestuttavan viestin puhelimeensa (www.is.fi)

Kove: Gylfi Gylfason (Pixabay)

Kommenteh

Čääli komment

Kirjoita kommenttisi!
Kirjoita nimesi tähän

Luuvâ meid

Uđđâsumos uđđâseh

Ovtâstum staatâi senatist láá tollum sosiaallii media jođetteijei koijâdâlmeh sosiaallii media vaikuttâsâin nuorâi torvolâšvuotân

Uđđâivemáánu 31. peeivi Ovtâstum staatâi seenaat ađai pajemuu ovdâskode lahâváljukodde koijâdâlâi sosiaallii media vuáháduvâi toimâjođetteijeid. Fáddán lâi vyeliahasij seksuaallâš puástukevttim já ávhástâllâm, mii sosiaallii...

Måneskin puátá vuosmuu tove Suomân

Italialaš rock-muusikjuávkku Måneskin puátá vuosmuu tove Suomân puáttee keesi. Muusikjuávkku láávdást Seinäjokist Provinssi-festivaalist kesimáánu 27. peeivi. Muusikjuávkku lii makkuuttâm keččeid pirrâ maailm, já sii...

Áávus ry viggá orniđ tuárispeln perruid astoäigitooimâ

Ive 2022 keessiv vittâ eeni čokkânii Anarist. Sist puohâin lijjii sämikielâliih párnááh já sij suogârdii vuovijd faallâđ párnáidis astoäigitooimâid sämikielân. Sij meridii vuáđudiđ tađe...

Sambialii irâttâsâst, mii uážui ovdedemiše Suomâst, kavnui pärnipargovyeimi

Sambialii irâttâsâst, mii uážui ovdedemiše Suomâst, kavnui pärnipargovyeimi. Irâttâs omâsteijee Lwenga Mulela mieldi koččâmâš ij lah pärnipargovyeimist tondiet ko párnáid ij lah maksum pälkki....

WWF lii kulluuttâm saimaanuárjoid pessimráávhu lasanem várás

Saimaanuárju lii nuárjušlaajâ, mii iälá tuše Suomâst. Tot lii uáli uhkevuálásâš. Saimaanuárjuh lasaneh kuovâ- teikâ njuhčâmáánust. Nuárjučiivgah šaddeh muotâpiäjust, mon niŋálâs lii kuáivum. Lii...