Anarâškielâ seervist lii tääl almostum Jeff Kinney särjikoveroomaan ”Čuovâuáivi peivikirje – hyenes luho keesi”, mon Fabrizio Brecciaroli lii jurgâlâm anarâškielân. Kirje lii algâalgâlávt čallum eŋgâlâskielân.
”Čuovâuáivi peivikirje – hyenes luho keesi” lii Čuovâuáivi peivikirje -rááiđu niäljád kirje. Rááiđu vuossâmuš kirje almostui eŋgâlâskielân ive 2007. Tastmaŋa ráiđu lii vijđánâm jotelávt, já roovvâdmáánu 24. peeivi 2023 Ovtâstum staatâin almostui ton 18. kirje. Rááiđu sáŋgárin lii paješkoovlâ uáppee Greg Heffley. Suu perrui kuleh eeči (Frank), enni (Susan), stuorrâviljâ (Rodrick) já uccâviljâ (Manny). Peivikiirján Greg čáálá jieijâs elimist já feeriimijn Plainview-nommâsii kaavpugist.
Anarâškielâ servi lii finnim ameriklii kuástideijest love almostittiđ ubâ rááiđu anarâškielân. Ađai iivij mield puátih lase Čuovâuáivi-kirjeh. Rááiđu vuossâmuš kirje almostui anarâškielân ive 2020 noomáin ”Čuovâuáivi peivikirje”. Tom lii jurgâlâm Mikkâl Morottaja. Fabrizio Brecciaroli jurgâlem nubbe já kuálmád kirje almostuvvii ive 2022 nomâiguin ”Čuovâuáivi peivikirje – stuorrâviljâ almaaštâl” já ”Čuovâuáivi peivikirje – jo rijttáá”.
Taankiärdásii kirjeest Greg Heffley lii kesiluámust. Piäiváš páštá já luándu hokâttâl. Mut kost lii Greg? Sun čokkáá pääihist keččâmin televisio já spellâmin videospeelâid. Greg lii-uv taggaar ”sisolmooš”, kiän mielâst pyeremus vyehi viettiđ keesi lii láškuttâllâđ jieijâs pääihist, ráávhust njuolgâdusâittáá já kenigâsvuođâittáá. Eeni mielâst vist tievâslâš kesiluámu lii kuittâg čuuvtij ereslágán: virkkuus olgonlihâdem, ovdedeijee kirjálâšvuotâ, perruu ohtâsiih reeisuh já nuuvt ain. Mut kuábbáá uáinu vuáittá? Vâi muttá-uv uđđâ perruujeessân puoh?
Kirje puáhtá tiiláđ seervi mediapargest (fabrizio.brecciaroli@gmail.com). Tom puáhtá meiddei uástiđ Duodji Shopist Sajosist.
Kove: Fabrizio Brecciaroli