Lávurduv 16.9. lii maailm vuossâmuš Kaddâlâs peivi (su. Kanteleen päivä). Váldutuáluh láá Helsigist, mutâ tábáhtumeh uárnejuvvojeh meiddei ucebijn siijdâin pirrâ Suomâ. Aanaar kieldâst lii viettum Kaddâlâs peivi jo kyehti oho, já váldutábáhtume lii lávurduv tijme 13 konsertist Avelist, škovlâ- já kulttuurkuávdáš Kaarrest.
Tai kyevti ohhoost kaddâlâspedagog Jessika Lampi lii máttááttâm Anarist já Avelist kyevti kuursâst aalmugmuusik já kaddâlâs čuojâttem puohahasáid čuojâtteijeid. Lampi muštâl, ete Aanaar aalmugopâttuvâst lii puáhtám čuojâttiđ uccâ kaddâlâs jo lovmat ihheed. Kieldâst kávnojeh tääl masa kyehtlov aktiivlâš čuojâtteijed já sii lasseen maŋgâ taggaar, kiäh eellih uánihâš kuursâin ucâmin pyeri mielâ čuojâtmáin.
Lávurduv konsertist kullojeh puoh Aanaar kieldâ nelji kielâ: anarâš-, nuorttâlâš- já tavekielâ sehe suomâkielâ. Konsert uárnejeijeeh väldih káidusohtâvuođâ peeivi váldukonsertân, Helsigân kuávdáškirjerááju Oodin já vuolgâtteh toho muusiktiervuođâid Säämist. Konsert uárnejuvvoo uássin Avveel pyereestvaijeempeeivi, mon uárnee Pilvi Ingebritsen já mon taha máhđulâžžân Aanaar kieldâ. Tábáhtume lii nuuvtá.
Kaddâlâs peivi lii väldikodálâš juhlepeivi, mii uárnejuvvoo taan ive vuossâmuu tove. Kanteleliitto ry lii almottâm jieijâs ulmen, ete Kaddâlâs peivi šodâččij virgálâš lippupeivin já ete tom pesâččij ávudiđ puátteevuođâst jyehi ive.
Kaddâlâs lii syemmilij aalmugčuojânâs. Kanteleliitto toimâhovdâ Sanni Virta muštâl peeivi vuáđujurdust: ”Kaddâlâs lahtoo távjá Kalevala piäiván, mutâ häärvih tobdeh ton čuojânâs moodeern pele. Tondiet kaddâlâsâst kalga leđe jieijâs juhlepeivi.”
Suomâst láá suullân 5 000 kaddâlâsčuojâtteijed, kiäin suullân čyeti olmožid láá áámmátliih čuojâtteijeeh. Muusikopâttuvah, main kaddâlâsčuojâttem máttááttuvvoo, láá s. 70. Ohtâ tain lii Aanaar aalmugopâttâh.
Käldee:
– Maailman ensimmäinen Kanteleen päivä 16.9.2023 — 100 Kanteletta Oodissa (www.kantele.net)
Kove: Ulpu Mattus-Kumpunen