Venezia historjálâš kuávdážân puátá puáttee kiiđâ viiđâ euro siisâpeessâmmáksu. Venezia kaavpugstivrâ jienâstij majebaargâ siisâpeessâmliipu iskâstem peeleest, muštâl uđâstoimâttâh AFP.
Koččâmušâst lii iskâstem, mon jotkuumist meriduvvoo maŋeláá. Siisâpeessâmmáksu piärroo peivituristijn.
Siisâpeessâmmáksu vuáđuštâlloo toin naalijn, et kaavpug kuávdáá tuuriistmeeri lii pajanâm meendu ennuv. OA kulttuurornijdume Unesco avžui syeinimáánu loopâst, et Venezia lasettuuččij maailmärbiluvâttâlmist uhkevuálásâš čuosâttâhhân.
Unesco ceelhij talle, et Venezia historjálii kuávdáá já ton pirâstittee laaguun uhkedeh maacâthánnáá vahâgeh. Unesco čujottij ovdâmerkkân šoŋŋâdâhnubástus já massatuuriism pyevtittem hyenes peelijd.
Ulmuuh, kiäh uáinih kriittisávt siisâpeessâmmáávsu, láá arvâlâm, et viiđâ euro máksu ij val tuárvi raijii mađhâšeijei mere.
Käldee:
– Venetsia alkaa periä turisteilta pääsymaksua historialliseen keskustaan (www.hs.fi)
Kove: Neil Morrell (Pixabay)