Italialâš lávloo já laavlârähtee Salvatore ”Toto” Cutugno lii jáámmám 80-ihásâžžân. Sun jaamij taan oho majebaargâ pyecceiviäsust Milanost. Sun lâi šoddâm ive 1943 Fosdinovo kieldâst, Toscana kuávlust.
Cutugno karrieer aalgij 1960-lovvoost rumbučuojâtteijen. Sun tooimâi rumbučuojâtteijen vistig tagarijn muusikjuávhuin ko Ghigo e i goghi já Toto e i tati já talle Albatros-nommâsii muusikjuávhust, mon sun vuáđudij ive 1974.
Cutugno algâttij soolokarrieeris ive 1976. Sust šoodâi pegâlmâs ubâ maailmist ive 1983, ko sun almostitij pitá L’italiano ađai Italialâš. Raul Reiman jurgâlij pitá suomâkielân jo ton almostittemive, já toos adelui nommâ Olen suomalainen ađai Mun lam syemmilâš. Suomâkielâlii versio láávlui syemmilâš lávloo Kari Tapio.
Eres-uv pitáh láá jurgâlum suomâkielân. Tain tobdosumoseh láá Etsin kunnes löydän sun ađai Mun uusâm tassaažân ko kaavnâm tuu (algâalgâlâš nommâ Oasis), Kuusamo ađai Kuáccám (algâalgâlâš nommâ Africa) já Hei Buona Notte ađai Hei, pyeri ijjâ (algâalgâlâš nommâ Buonanotte). Suomâkielâlijd versioid láá lávlum tagareh muusiktääsnih ko Markku Aro, Danny já Paula Koivuniemi.
Lávloo já laavlârähtee karrieeris lasseen Cutugno piergij pyereest meiddei jieškote-uvlágánijn lávlumkištoin. Ive 1980 sun vuoitij San Remo -muusikfestivaalist pittáin Solo noi ađai Tuše mij, já ive 1990 sun vuoitij Euroviisuid pittáin Insieme: 1992 ađai Oovtâst: 1992.
Käldee:
– L’Italiano-hitistään tunnettu Toto Cutugno on kuollut (www.hs.fi)
Kove: Fabrizio Brecciaroli
Takkâ Fabrizio taan uđđasist, muštalam onne mii iiđeet vuolgattasâst tast. Jiem lijjii taan hoksáđ, jos jiem uáinám taan.
Takkâ!