Vuossaargâ kirdemfinnodâh Finnair uásus koočâi aldasáid 7 % Helsig pöörsist. Suijân toos lii tot, et Finnair toimâttâsjođetteijee Topi Manner kuáđá finnoduv já sirdâšuvá teleoperaattor Elisa toimâttâsjođetteijen. Elisa tááláš toimâttâsjođetteijee Veli-Matti Mattila lii päcimin iäláttâhân uáli jo kuhes paje maŋa: sun algâttij virgeest ive 2003.
Almottâs Manner uđđâ pargoost adelui vástuppeeivi ehidist tastmaŋa ko Helsig pörssi lâi jo moonnâm kiddâ. Siämmást Finnair muštâlij meiddei, et finnodâh lii jo usâškuáttám uđđâ toimâttâsjođetteijee.
Vuossaargâ tijme 14 suulâin Finnair uássus árvu Helsig pöörsist lâi 0,50 €, ađai tot lâi jo monâttâm suullân 6 % jieijâs áárvust. Enâmustáá peeivi ääigi uásus lâi -6,9 %:ist. Tot lii uáli jo hyenes puáđus – eromâšávt jis váldoo huámášumán tot, et vuossargâ lâi pyeri peivi Helsig pöörsist já pörssi lâi čielgâsávt vuáitu peln. Elisa uásus vist lâi vuossaargâ masa siämmáá tääsist ko vástuppeeivi-uv.
Talle ko Manner algâttij Finnair toimâttâsjođetteijen uđđâivemáánu 1. peeivi 2019, te oovtâ uássus hadde lâi 1,30 €. Majemuuh iveh láá lamaš hástuliih Finnairân koronapandemia sehe Ruošâ já Ukraina koskâsii suáđi keežild. Suáti lii vaiguttâm čuuvtij finnoduv Aasia-strategian, tastko volliittem rääjist Finnair kirdemmašineh iä lah uážžum kirdeđ nuortâs Ruošâ paajaabeln.
Nordea-paaŋki äššitobdei mielâst Manner toimâpiirâs Elisast lii tuođânálásávt ”rávhálub”. Sii Elisan kyeskee kommentist lohá, et ”Finnair toimâttâsjođetteijen Manner lii stivrim finnoduv čoođâ koronapandemia, já sust lii šoddâm taggaar jođetteijee, kote piergee kriisâtiileest.”
Käldee:
– Finnairin osake vajoaa toimitusjohtaja Topi Mannerin lähtöilmoituksen jälkeen (www.hs.fi)
Kove: John H. (Pixabay)