Aalmugijkoskâsii haddeviärdádâllâm mield Suomâ lâi moonnâm ive Euroop čiččâdin tivrâsumos eennâm. Viärdádâlmist lijjii fáárust 36 enâmid. Tain puoh tivrâsumos lâi Sveicci, já hälbimus lâi Turkki. Sveicci já Turkki láá kuohtuuh Euroop union ulguubeln. Nubben tivrâsumos eennâm lâi Island, mii ij meidgin kuulâ Euroop unionân. Kuálmádin poođij Irland, mii lii tivrâsumos eennâm Euroop unionist. Tivrâsuboh ko Suomâ lijjii meiddei Tanska, Taažâ já Luxemburg. Ruotâ vist poođij kávcádin, ađai tot lâi ucánjáhháá häälbib ko Suomâ.
Statistiikkuávdáá mield päikkimašinij já makkuuttâselektroniik hadeh lijjii moonnâm ive Suomâst alda eurooplii koskâtääsi. Suomâst eromâš tiivrâs lâi alkohol. Moonnâm ive Suomâst alkoholjuhâmušâi hadeh lijjii Euroop kuálmádin tivrâsumoseh Island já Taažâ maŋa.
– Alkohol já tubbáák stuorrâ haddeiäruh enâmij kooskâst láá iänááš kiddâ tast, magareh viäruh jieškođe-uv enâmist láá, čielgee Statistiikkuávdáá pajeaktuaar Harri Kananoja.
Statistiikkuávdáá mield purrâmuš lâi Suomâst Euroop kávcádin tivrâsumos moonnâm ive.
– Ruošâ já Ukraina koskâsii suáđi keežild purrâmuš hadeh pajanii čuuvtij ubâ maailmist – meid Suomâst. Energia hadeh pajanii, já meid viehâkolvuuh šoddii tivrâsubbon, Kananoja muštâl.
Käldee:
– Suomi oli Euroopan seitsemänneksi kallein maa viime vuonna (yle.fi)
Kove: Tumisu (Pixabay)