Eurooplij mađhâšeijei meeri Ovtâstum staatáid lii čuuvtij kiäppánâm majemui mánuppojij ääigi ton ääigi ko Donald Trump lii toimâm nube virgepaajees Ovtâstum staatâi presidentin, muštâl Financial Times eennâm haldâttuv almostittem statistiik vuáđuld.
Ucemustáá oovtâ iijâ Ovtâstum staatâin orroo viestâreurooplij meeri lâi kiäppánâm njuhčâmáánust 17 prosentid tijmáá njuhčâ-cuáŋuimáánust, Ovtâstum staatâi kävppiministeriö vuálásii virgáduv statistiik tuođâšt.
Financial Times mield mađhâšeijei meeri lii kiäppánâm pooliitlij já ekonoomlij keldui já vajemielâlii räjikocemân kyeskee paloi keežild.
Maaŋgah Euroop enâmeh, meid Suomâ, láá váruttâm ulmuid räjikocceem čovgiimist já ton máhđulijn čuávumušâin Ovtâstum staatáid maađhâšdijn. Maaŋgâin enâmijn lii meid čallum tast, moin naalijn ulmuid láá šoddâm vädisvuođah Ovtâstum staatâi rääji alne.
Pooliitliih kelduuh uáinojeh eromâšávt tanskalij perustuumeest mađhâšiđ Ovtâstum staatáid. Tijmáást tanskalij mađhâšem lii kiäppánâm 33,9 prosentid. Kiäppánem tyehin láá meid Trump uhkedmeh Ruánááeennâm haaldunväldimist. Ton lasseen väripresident J. D. Vance lii piälkkám Taanskan já váruttâm tom, et tot ij lah ”hirmâd pyeri litolâš”.
Luxemburg västideijee loho lii 43,2 prosentid já Islandist 35,3 prosentid. Euroop stuorrâ enâmijn Saksa ässei kolliistâlmeh láá kiäppánâm 28,2 prosentáin, Espanjast 24,6 prosentáin já Ranskaast kavccijn prosentáin. Euroop enâmijn iänááš kyesih Ovtâstum staatáid puátih Britanniast: njuhčâmáánust paijeel 283 000 mađhâšeijed Britanniast urruu ucemustáá oovtâ iijâ Ovtâstum staatâin. Tot lâi kuittâg 14,3 prosentid ucceeb ko ihe tassaaš.
Syemmiliih láá mađhâšâm 9,5 prosentid ucceeb Ovtâstum staatáid ko tijmá taan ääigi. Ruotâ loho lii 16,6 já Taažâ loho 24,6 prosentid.
Kuulmâ Euroop enâmist mađhâšem lii ucánjáhháá lasanâm tijmáást Ovtâstum staatáid. Taah enâmeh lijjii Kreikka (1,8 prooseent), Vuáládâhenâmeh (3 prooseent) já Slovenia (41,2 prooseent).
Ubâ viestâr-Euroopist määđhih Ovtâstum staatáid láá kiäppánâm 17,2 prosentid tijmáást. Ubâ maailm uásild mađhâšem lii kiäppánâm 12 prosentid, mut Kanada já Meksiko lovoh iä lah täst fáárust.
Ranskalii hooteelsalvân Accor mield eurooplij kuosij toohâm hooteelväärridmeh láá kiäppánâm 25 prosentáin. Meid eres mađhâšemsyergi irâttâsah muštâleh, et määđhih Ovtâstum staatáid láá macâttum ennuv.
Palo lii meid, et keessiv ulmuuh iä innig maađhâš Ovtâstum staatáid siämmáá ennuv ko ovdil: tääl eurooplij kuosij hooteelväärridmij meeri lii kiäppánâm puáttee kiäsán 25 prosentáin, já maŋgâseh láá majemui aigij macâttâm jo väridum määđhis.
Financial Times mield vuáláneijee mađhâšemtrendi uhked Ovtâstum staatâi mađhâšemsyergi, mon uási eennâm bruttoaalmugpuovtâdâsâst lii 2,5 prooseent. Tutkâmij mield oovtâ ovtâstumstaatâlii pargosaje tuárjumân tarbâšuvvojeh 40 almugijkoskâsâš kolliimid. Taan vuáđuld näggejuvvoo-uv, et mađhâšemmoovtâ lappum uhked tuháttijd pargosoojijd Ovtâstum staatâin.
Käldee:
– European travellers cancel US visits as Trump’s policies threaten tourism (www.ft.com)
Kove: Leonhard Niederwimmer (Pixabay)