Hurske kaačâi uđđâ ulâttâsääigi 12,70 sekuntid taan koskoho Jyväskylä GP-kištoi semifinalist. Oovdeb ulâttâs haldâšeijee lâi Annimari Korte, kote kaačâi ääigi 12,72 Joensuust syeinimáánust 2019. Siämmáin kištoin lii meid šoddâm Hurske puáris ulâttâs 12,78. Hurske vuoitij meid ubâ kišto, ko sun kaačâi fiinaal ááigán 12,80, mii lâi meid suu kuálmádin pyeremus äigi kuássin.
Hurske čođâldâs lâi tondiet-uv merhâšittee, ete suu ulâttâs lii meid taan paje Euroop njunošpuáđus. Tot loppeed Hursken uáli puorijd puátusijd puáttee kištoin já eromâšávt porgemáánu Budapest maailmmiäštárvuotâkištoin, moi puáđusrääji 12,78 vuálá suu äigi meid moonâi. Hurske lii ovdil taan ive peessâm olgoroođij árvukištoin semifinalân vittii: kulmii EM-kištoin já ohtii MM-kištoin sehe olympialijn. Moonnâm täälvi sun vuoitij Istanbul sisroođij EM-kištoin 60 meetter äiđikaččâm euroopmiäštárvuođâ.
Taan keesi algâ lii lamaš mudoi-uv uáli pyeri syemmilâš almosvalastâlleid, tastko Hurske kaččâm lâi jo niäljád uđđâ olgoroođij ulâttâs taan ive. Alisa Vainio kaačâi maraton Suomâ ulâttâs kuovâmáánust, já ton maŋa siämmáá lává porgâm meid Camilla Richardsson 10 000 meetter já Viivi Lehikoinen 400 meetter kaččâmist.
Käldeeh:
– Reetta Hurskeen huippuveto pisti asiantuntijan veikkauksen heti uusiksi – SE-naisella on potentiaalia melkoiseen paukkuun (yle.fi)
– Camilla Richardsson juoksi hurjan Suomen ennätyksen (yle.fi)
– Vainio juoksi maratonin Suomen ennätyksen Sevillassa: Olin hyvin vauhdin päällä koko matkan (www.yleisurheilu.fi)
Kove: Roy Harryman from Pixabay