Kaarinalâš, 32-ihásâš, nube paje aalmugovdâsteijee Sofia Virta väljejui Ruánáá lito uđđâ saavâjođetteijen lávurduv Seinäjoki piäládâhčuákkimist. Virta finnij piäláduv jesânij koskâsii jienâstmist 2 760 jiennâd ađai suulân 58 % jienâin. Nubben iävtukkâssân lâi espoolâš aalmugovdâsteijee Saara Hyrkkö, kote finnij 1 941 jiennâd (41 %). Jienah lijjii ohtsis 4 731, main 30 lijjii kuáruseh. Ruánái oovdeb saavâjođetteijen ive 2019 rääjist tooimâi Maria Ohisalo, kote almottij cuáŋuimáánu ovdâskoddevaaljâi maŋa, ete sun ij ááigu juátkiđ tooimâst. Sun meid eeđâi, ete sun tuárjuččij kiäm peri, kote väljejuvvoo suu sajan. Hyrkkö-uv almottij jienâstem maŋa, ete sun tuárju uđđâ saavâjođetteijee.
Virta lii toimâm aalmugovdâsteijen ive 2019 rääjist, kuás sun väljejui Varsinais-Suomâ vaaljâpirrâduvâst 4 289 jienáin. Taan ive vaaljâin sun peesâi ovdâskoodán uđđâsist siämmáá vaaljâpirrâduvâst 5 533 jienáin. Ton lasseen sun lii toimâm Kaarina kaavpug váldustiivrâst ive 2017 rääjist já Varsinais-Suomâ kuávluváldustiivrâst ive 2022 rääjist. Ovdil politiik Virta tooimâi párnáisuoijâlmist sehe mielâtiervâsvuotâpargoost já uáiváditteehuolâttâsâst.
Uđđâ saavâjođetteijest lii viehâ vädis pargo vyerdimin, tastko piäládâh killái vaaljâtáppám moonnâm cuáŋuimáánu ovdâskoddevaaljâin. Ruánááh finnejii ive 2019 ovdâskoddevaaljâin 11,5 % jienâin já 20 ovdâsteijed. Taan ive vaaljâin vist piäládâh finnij innig 7,0 % jienâin já 13 ovdâsteijed. Siämmást ovdâskoddeest koočâi ovdâmerkkân tallaš värisaavâjođetteijee Iiris Suomela. Ko Ohisalo almottij cuáŋuimáánust, ete sun ij ááigu juátkiđ, te maaŋgah piäláduv merhâšittee noomah, tego värisaavâjođetteijeeh Iiris Suomela já Atte Harjanne sehe Sanna Marin haldâttâs olgominister Krista Mikkonen, kiäldádâttii saavâjođetteijeekiišton uásálistmist. Loppâloopâst kiišton passijn tuše Virta já Hyrkkö. Virta annoo ekonomâlávt viehâ uálgispiäládâhlâžžân, já motomeh tuáivuh, ete suu saavâjođetteijeevuotâ hokâttâlâččij nuuvt kočodum “čuovjisruánáá” jienâsteijeid. Virta jieš eeđâi Yle sahhiittâlmist, ete piäláduv tile pyeredem váátá korrâ pargo já vyeligâš munejurduu. Sun meid tuáivu, ete ruánááh vyelgih ovdâskulij ohtâlâs juávkkun.
Piäládâhčuákkimist väljejuvvojii meid eres merhâšittee tooimah. Uđđâ värisaavâjođetteijen väljejuvvojii Oras Tynkkynen, Silja Keränen já Bella Forsgrén, piäládâhstiivrâ saavâjođetteijen väljejui Riina Lumme, já piäládâhčällen väljejui Anna Moring.
Käldeeh:
– Vihreät uusi puoluejohtonsa ja päätti tukea Haavistoa presidenttikisassa – Sofia Virran mielestä ilmastotavoitteista lipsuminen olisi ”typeryyttä” (yle.fi)
– Vasta-Virta (yle.fi)
– Yksi kieltäytyminen lisää – Fatim Diarra ei lähde vihreiden puheenjohtajakisaan (www.is.fi)
Kove: Gerd Altmann (Pixabay)