Čuovâuáivi peivikirje – stuorrâviljâ almaaštâl lii Jeff Kinney nubbe kirje Čuovâuáivi peivikirje -ráiđukoveroomaanrááiđust. Tot almostui eŋgâlâskielân jo ive 2008, suomâkielân 2009 já anarâškielân 2022. Anarâškielân tom lii jurgâlâm Fabrizio Brecciaroli. Kirje luvâdijnân mun smiettim ubâ ääigi, ete kielâ lii hirmâd riges já hävski. Mun jiem lamaš luuhâm ovdil oovtâgin Čuovâuáivi peivikirje suomâkielân, já ton keežild taat jurgâlus lâi tuođâi luhostum.
Harvii párnáid tâi nuoráid uáivildum kirjeest säneh láá kevttum siämmáá häävskiht. Muu mielâst hävskis säneh já eđâlduvah láá om. pokkiidâttâđ, máttáátteijee jiellâh, ruásigyettiđ, pessiuáivi, pulččođ, parfađ, hardâšuttee, kollečuágáš já tuođâlij muáđuiguin.
Kirjeest láá meiddei ennuv skalkkâsaavah já vuolâstmeh, om. eenist lijjii eenâb juonah ko suonah.
- Lijkkuuh-uvks tun lahcâjieŋân?
- Joo!
- Naajâ talle toin!
Ko kirje uáivipersovn Greg lâi párnáikäärdi ahasâš, te sun iberdij skalkkâsaavâ váhá puástud já čuávuváá peeivi sun mainâstij siämmáá skalkkâsaavâ nube párnážân.
- Tun šoodah styeresin já naajah motomáin lahcâjieŋáin! HAH!
Mun lijkkojim meiddei toos, ete mun tarbâšim uuccâđ saanijd sänikirjeest. Mun iberdim masa puoh celkkuid, mutâ halijdiččim tiettiđ tárkká, maggaar sárnumstijlâ (om. huálištiđ, mulijdiđ, sovkkâliđ, pulččođ) kuás-uv lâi.
Kirje lii jotteel luuhâđ. Kielâ lii älkkee, já koveh já sárnumpuljâreh taheh luuhâm vala jotelubbon. Kirje suápá pyereest párnáid já nuorâid sehe tagaráid, kiäh esken láá opâttâlmin kielâ.
Sonja Valle
Kove: Fabrizio Brecciaroli