Tiervâsvuođâ já pyereestvaijeem lágádâs THL (Terveyden ja hyvinvoinnin laitos) arvâlus mield aheulmuid já tiätu riskâjuávhoid avžuuttuvvoo tievâsmittee koronapuáhuttâs máhđulávt jo čohčuv. Jis tot fálloo, te tot adeluvvoo siämmáá-áigásávt influenssapuáhuttâssáin skammâ-juovlâmáánust.
THL täärhist munearvâlusâs forgâpalij kesimáánust, kuás oroh lemin eenâb tiäđuh eereeb iärrás puáhuttâsâst, mii lii aanoost čohčuv, já ton toimâmist tagarij virusvariantij vuástá, moh láá eidu talle joođoost. Talle láá tärhibeh tiäđuh meid Suomân puáttee uđđâ puáhuttâsâi meereest já puáhuttâs siskáldâsâst, mon talhâsvirgeomâhááh láá tuhhiittâm.
”Taat lii munetiätu máhđulávt vuáimán puáttee avžuuttâsâst. Lii tehelâš, et áámmátliih kiedist pyehtih vuáváđ já rahttâttâđ puáhuttâssáid puorijn aigijn. Mij liijká čuávvup uđđâ tutkâmtiäđuid puáhuttâsâin já toi arvâlum vaiguttâsâin sierâ ahejuávhoid, vâi mij pyehtip tärhistiđ munearvâlus já avžuuttâs”, muštâl THL njunoštuáhtár Hanna Nohynek.
Pyereestvaijeemkuávluh västideh puáhuttâsâi orniimist já muštâleh, kost já kuás puáhuttâs puáhtá finniđ.
Avžuuttâsah koronapuáhuttâsâin vuáđuduveh Aalmuglii puáhuttâsäššitobdeejuávhu já THL ohtsâš arvâlmáid.
Táálááh avžuuttâsah láá ain vyeimist
Čoohčân suunâttâllum máhđulâš tievâsmittee puáhuttâs kuáská jo 65 ihheed tiävdám ulmuid já talhâstieđâlávt riskâjuávkun kulleid. Taan tiäđu mield tiervâs ulmuuh, kiäh láá vuálá 65-ihásiih, iä taarbâš tievâsmittee koronapuáhuttâs. Taan juávkun kuleh meid soti-syergi pargeeh já párnááh. Čoovčâ puáhuttâsavžuuttâs visásmittoo, jis ton addelmân láá talhâstieđâliih já epidemiologisiih suujah.
Tááláá arvâlus mield korona já influenssa talhâstieđâlijd riskâjuávhuid lii pyeri oovtnálásittiđ nuuvt ennuv ko máhđulâš.
THL ovdil adelem avžuumeh koronapuáhuttâsâi vuáđusarjaast já tievâsmittee puáhuttâsâin láá ain vyeimist.
Tiäđuh čoovčâ puáhuttâsâin šaddeh forgâpalij tärhibin
Táálái tiäđui mield čoovčâ puáhuttâsâin kevttuuččii mielâstubbooht-uv variantij várás heiviittum puáhuttâsah ko tagareh BA.1- já BA.4-5-variantij várás heiviittum puáhuttâsah, moh láá tääl ráájust. Táálái BA.1- já BA.4-5-puáhuttâsâi adelem syeji tääl joođoost leijee variantij tovâttem njuámumij já pyecceiviäsutipšo vättee taavdâ vuástá oro lemin ucce hiäjumui ulmui juávhust.
”Puoh koronapuáhuttâsah, moh láá tääl kiävtust Suomâst, syeijejeh pyereest viärráás taavdâ vuástá”, Hanna Nohynek muštâl.
THL tieđeet maŋeláá, magareh puáhuttâsah váldojeh anon čoovčâ tievâsmittee puáhuttâssân já kuás Suomân puátih uđđâ puáhuttâstoimâttâsah.
THL čuávu uđđâ tutkâmtiäđuid já epidemia ovdánem nuuvt Suomâst ko eres-uv soojijn maailmist já muttá avžuuttâsâid táárbu mield talhâstieđâlij vuáđustâsâi vuáđuld.
Käldee:
– THL:n ennakkoarvio: koronarokotteen tehosteannos iäkkäille ja tietyille riskiryhmille syksyllä (thl.fi)
Kove: MasterTux (Pixabay)