Nevada Las Vegasist puáttee jieŋâskiärrujuávkku Vegas Golden Knights lii vuáittám taan ive Stanley Cup. Finalist juávhu vuástá lâi Florida Panthers, mon tot vuoitij 4–1. Koskoho iđedisiijâ Vegas Golden Knights vuoitij fiinaalrááiđu viiđâd já majemuu speelâ päikkikeččei oovdâst joba 9–3. Juávkku haldâšij fiinaal mudoi-uv viehâ čielgâsávt, ko tot vuoitij vuosmuu speelâ 5–2 já nube 7–2. Florida Panthers luhostui vyeittiđ tuše oovtâ, rááiđu kuálmád speelâ.
Taan ive miäštárvuotâ lâi Vegas Golden Knights vuosmuš. Servi lii ohtâ NHL uđđâsumosijn. Tot vuáđudui ive 2017, tastko NHL-liiga halijdij tassiđ seervij mere nuorttâ- já viestârkonferens kooskâst. Siämmáá suujâst ive 2021 vuáđudui nubbe-uv juávkku: Seattle Kraken. Vegas Golden Knights miänástui jo vuosmuu ive uáli pyereest, ko tot peesâi Stanley Cup finalân, mut táppái Washington Capitalsân 4–1. Florida Panthersân fiinaalsaje lâi meid nubbe. Tot táppái Colorado Avalanchen 4–0 ive 1996. Florida juávhust spellii taan ive kulmâ syemmilii: Eetu Luostarinen, Anton Lundell já juávhu kapteen Aleksander Barkov. Vegas Golden Knightsist ij spellâm taan keerdi ohtâgin syemmilâš.
Käldee:
– Golden Knights win Stanley Cup with Game 5 victory against Panthers (www.nhl.com)
Kove: Photo Mix (Pixabay)