Taan oho viättoo väldikodálâš luuhâmokko, mii fáálá luhâmân já kirjálâšvuotân kyeskee tiäđuid já siskáldâs. Majemui iivij toos lii kuullâm meiddei Laapi kirjeráájui ornim Huhuu!-festivaal. Festivaal ääigi uárnejuvvojeh jieškote-uvlágáneh tábáhtusah, main kulloo meid sämikielâ.
Uássin festivaal ohjelmist Ruávinjaargâ kaavpugkirjerááju almostitij onne YouTube-tilistis mainâspuudâid anarâškielân, tavesämikielân já nuorttâlâškielân. Videoh láá ááimuin vyesimáánu niäljád peeivi räi.
Anarâškielâlii videon väljejui maainâs Nuáidi omâs kyessi uđđâ anarâškielâlii párnáimainâsantologiast Mainâsij ihe – Čoođâ skaamâ. Mainâs lii čáállám Anja Kaarret, já videost tom lohá Anna-Maija Kanerva.
Tavesämikielâlii videost Karoliina Harvala muštâl Kulmâ poccuu ‑mainâs. Tot lii ”sämiversio” puáris taažâ mainâsist Kulmâ kaiccâviercâ, mast kaiccâviercah joteh mottoom šalde mield, mon vyelni áásá stáálu.
Nuorttâlâškielâlii videost Merja Fofonoff já Tiina Mäntylä luuhâv nuorttâlâš- já suomâkielân Polfe-nooveel (nuorttâlâškielân Po´lff, suomâkielân Bovnji). Nooveel lii uási Niilo Aikio Nigá-nooveelčuágálduvâst (nuorttâlâškielân Nekk, suomâkielân Niga), mii siskeeld 25 novellid Nigá-nommâsii kaandâ elimist. Tot vuáđuduvá tuođâláid tábáhtuumijd.
Majebaargâ 21.4. tijme 17.30–18 Ruávinjaargâ kaavpugkirjerááju uárnee Hupsis Kupsis ‑mainâspuudâ tavesämikielân já suomâkielân. Koskoho 22.4. tijme 10 uárnejuvvoo tavesämikielâlâš mainâspuddâ Korkalovaara kirjeráájust Ruávinjaargâst.
Huhuu!-festivaal
Huhuu!-festivaal lii Laapi kirjeráájui ornim párnáikirjálâšvuotâ- já sänitaaiđâfestivaal. Tot uárnejui vuosmuu tove čohčuv 2021. Festivaal lii uáivildum eromâšávt 0–12‑ihásáid párnáid sehe pärniperruid.
Ive 2026 Huhuu!-festivaal ohjelmân kuleh eereeb iärrás mainâspuudah já kirječällei kolliistâlmeh. Ohjelm uárnejuvvoo aainâs Kiemâ, Kiemâjäävri, Puášu, Ruávinjaargâ, Salla já Tervola kirjeráájuin. Uápáásm festivaal ohjelmân.
Luuvâ lase (suomâkielân) luuhâmohhoost já Huhuu!-festivaalist.
Artikkâlkove: Valtteri Valkeapolku
Uuđâs peividum 20.4.2026 tme 15.42: Tievâsmittum Nigá-nooveelčuágálduv já ton Polfe-nooveel noomah nuorttâlâškielân já suomâkielân.