Finnair uđâsmit Euroop kirdemjotoluvvâst aanoost leijee kezisruŋgomašinijdis. Tot lii ráhtám sopâmuš Embraeráin käävcinubálov E195‑E2-maašin tiiláámist. Sopâmušân kuleh meid optioh kuđânubálov mašinân já uástimvuoigâdvuotâ kyevtnubálov mašinân. Finnair lii meid ráhtám sopâmuš RTX Pratt & Whitneyin värimoottorijn já huolâttâspalvâlusâin Embraer E2 ‑mašinij PW1900G GTF ‑moottoráid. Taan lasseen Finnair áigu haahâđ kevttum kirdemmašinij markkânijn enâmustáá kyehtnubáloh Airbus A320/321ceo ‑mašinid.
”Taat uđđâ já kevttum kirdemmašinij ovtâstittem tuárju mii strategia já stuárrum já kyedittetteevuođâ pyeremuin máhđulijn vuovvijn”, iätá Finnair toimâttâhhovdâ Turkka Kuusisto Finnair tiäđáttâsâst. ”Investistem nannee Finnair máhđulâšvuođâ faallâđ äššigâššáid šaddee, kiäsuttettee viärmáduv já eromâš pyere lyetittetteevuođâ já äššigâšfeerim. Uđđâ E195‑E2-maašin anonväldim keeppid meid čiđđâdioksidluoštuid já oovded šoŋŋâdâhuulmijd.”
Vuosmuuh E195-E2-mašineh Finnairân ive 2027
”Embraer E195‑E2 heivee eromâšávt mii tárboid já taha máhđulâžžân kievrâb kuávlulii viärmáduv, mii pyereed ohtâvuođâid Suomâst já Suomân já meid hááhá mađhâšeijeid kukkenorroo jotolâhviärmádâhân”, iätá Kuusisto. 134‑sajasij Embraer E195‑E2 ‑mašinij toimâttem kolgâččij älgiđ ive 2027 majemuu niäljádâsâst. Kulmâ maašin toimâttuvvojeh ive 2027, kuttâ maašin ive 2028 já kuttâ meid ive 2029. Mašineh láá puátimin Norra kiävtun, mii operist Finnairân kuávlulii jotoluv Embraer- já ATR-mašinijgijn.
A320/321ceo-mašineh puátih puáris A319- ja A320-mašinij sajan
Finnair áigu čuávuvái ivij haahâđ kevttum mašinij markkânijn enâmustáá kyehtnubáloh A320/321ceo-mašinid irâttâs puárásumos A319- já A320-mašinij sajan. Kirdemmašinij meeri já tärhis toimâttemäigi suáppojeh taađeest ko valmâštâlmeh ovdáneh.
Finnair tääl
Finnairist láá tääl 79 Airbus-, Embraer- já ATR-mašinid. Finnair operistem já omâstem mašineh láá uáinimnáál Finnair viermisiijđoin.
Käldeeh:
– Finnair uudistaa kapearunkolaivastoaan tilaamalla 18 E195-E2-konetta Embraerilta ja hankkimalla A320/321ceo-koneita käytettyjen lentokoneiden markkinalta (company.finnair.com/fi)
– Finnair ostaa sekä käytettyjä että uusia lentokoneita (yle.fi)
Kove: Marja-Liisa Olthuis