Ruátálâš Armand Duplantis lii oppeet pyeredâm stávránjuškim maailmulâttâs, kyehtlov peivid ton maŋa ko sun majemustáá pyeredij ovdebáá maailmulâttâs olympialijn. Tääl sun moonâi rima paijeel nubbijn iirâtmáin. Uđđâ ulâttâs lii tääl 6,26 m. Ulâttâs puáránij ovttáin senttijn Diamond League -kištoin Puola Chorzówist. Uđđâ maailmulâttâssáin sun njuškij jo ohcelovváád keerdi paijeel kuuđâ meetterist. Taat lii jo oovcád kerdi maŋaluvâi, ko sun pyereed maailmulâttâs.
Duplantis vuoitij olympiakole stávránjuškiimist Pariisist maailmulâttâssáin 6,25 m. Olympialijn sun njuškij maailmulâttâs kuálmádáin iirâtmáin.
Vuosmuu kollemitalis Duplantis vuoitij Tokiost 2021 puátusáin 6,02 m.
Ovdil Duplantis stávránjuškim maailmulâttâs haldâšij ukrainalâš Sergei Bubka, kiän ulâttâs 6,14 m lâi vyeimist masa 30 ihheed. Bubka njuškij majemuu ulâttâsâs syeinimáánust 1994. Haalist sun lii njuškim seenti aleláá ađai 6,15 m. Bubka lâi vuosmuš stávránjuškejeijee maailmist, kote peesâi paijeel maagisii kuuđâ meetterist. Ohtnubáloh kerdid sun pyeredij jieijâs ulâttâs ovttáin senttimeetteráin. Taan siämmáá meetood kiävttá meid Duplantis. Taat sentti häävild -pyeredemmeetood lii iänááš-uv sponsoruáinust jurdâččum.
Käldee:
– Polsstokfenomeen Armand Duplantis wordt dankzij dit slimme trucje steenrijk, en hij heeft het nog afgekeken ook (sportnieuws.nl)
Kove: Frankie Fouganthin (Wikimedia Commons)