Ruátálâš Armand Duplantis lii vuáittám olympiakole stávránjuškiimist Pariisist mannjeed vuossargeehid. Sun njuškij siämmást meid uđđâ maailmulâttâs 6,25 m. Taat lii jo suu nubbe olympiakolle. Vuosmuu kollemitalis sun vuoitij Tokiost 2021 puátusáin 6,02 m.
Duplantis vuáittu lâi čielgâs jo aloduvvâst 6,00 m, mon maŋa sun paasij kištottâllâđ tuše jieijâs vuástá já pajedutij rima alodâhân 6,25 m. Vuosmuin kuovttijn irâttâssáin sun peesâi kale tuárvi pajas mut poođij rima oolâ já kočâttij tom. Kuálmádáin irâttâssáin sun moonâi šievnáál rima paijeel já rikoi jieijâs ovdebáá maailmulâttâs 6,24 m, mon sun lâi njuškim taan ive cuáŋuimáánust.
Kištoost nubben puáttám Ovtâstum staatâi njuškejeijee Sam Kendricks njuškij 5,95 m. Sunjin taat miitaal lâi eromâš tiervâpuáttám. Sun čielgij Yahoo/Sport sahhiittâlmist, et sust láá vala-uv počis tobdoh Tokio olympialijn, tastko tobbeen suu koronatestâ lâi positiivlâš já sun kaartâi karanteenân ige peessâmgin kištottâllâđ. Sun ij kuittâg lamaš mahten puocâmin iäge sust lamaš tavdâmeerhah. Sun čielgij, et taat koronafiäráán vaiguttij sunjin vala taan-uv kištoost. Sun liijká njuškij vuosmuid kulmâ aloduv vuosmuin irâttâssáin já tastoo vuoitij siilbâ.
Kuálmádin šoddâm kreikkalâš Emmanouil Karalis njuškij 5,90 m. Sun peesâi älkkeht 5,80 m já 5,85 m aloduvâin paijeel já joođhij alodâhân 5,90 m, mon sun meid selvâttij. Siämmást sun meid njuškij jieijâs ulâttâs, mii ovdil lâi 5,87 m. Taam sun njuškij EM-kištoin Rooma olympiastadionist kesimáánu 12. peeivi. Sun irâttij vala njuškiđ aloduvâst 5,95 m mut ij luhostum tast. Ko suu pronssi lâi čielgâm, te sun irâttij vala njuškiđ aloduvâst 6,00 m, mut totkin ij innig luhostum. Karalis lii vuáittám kuohtii siilbâ ivij 2019 já 2021 almosvalastâllâm vuálá 23-ihásij euroopmiäštárvuotâkištoin. Tokio olympialijn sun lâi niäljád. Taat Karalis miitaal lii vuosmuš miitaal Kreeikan stávránjuškiimist 68 ihán.
Käldeeh:
– Armand Duplantis teki sen taas! Huima maailmanennätys (yle.fi)
– Olympic pole vault: Crushed by COVID in Tokyo, Sam Kendricks grabs silver in Paris (sports.yahoo.com)
– Emmanouil Karalis Wins Bronze in Pole Vault at Paris Olympics (greekreporter.com)
Kove: Frankie Fouganthin (Wikimedia Commons)