Anarâš aavisist lii lamaš aktiivlâš keesi. Njunoštoimâtteijee äigi lii moonnâm čallui luhâmân já almostitmân. Kielâtipšost lii lamaš ennuv luhâmuš. Tággáár čallui meeri lii aavisân uáli jo härvinâš. Ovdil keesi lii lamaš palo tast, et ležeh-uv tuárvi čalluuhkin, ko keessiv ”mihheen ij tábáhtuu”. Taan keesi tábáhtumeh láá lamaš valjeeht, já toimâttâh lii čuávvum taid aktiivlávt, já jyehi sajan ij lah kiergânâmgin.
Aavis peividuvvoo táválávt 5–8 kerdid ohhoost, nuuvt ete uđđâ luhâmuš almostittoo masa jyehi peeivi. Prinsiiplávt ruuđâi uuccâm uáinust aavis ferttee peividiđ ucemustáá kulmii ohhoost. Keevâtlávt tot kuittâg peividuvvoo čuuvtij eenâb. Jis smiättá aavisân adelum siskáldâsvátámâšâid, te lii čielgâs, et kulmáin peividmáin ij aldagin piergii. Uđđâsij jurâttem páihálii tääsist ij pijsáá. Kalgeh leđe meiddei aalmugijkoskâsiih já ubâ enâmân kyeskee uđđâseh sehe tagareh uđđâseh, moh kyeskih ekonomian, valastâlmân, politiikân, tiettui já nuuvt ain. Uđđâsij lasseen aavisist kalgeh leđe meiddei toimâttuvliih elementeh ađai blogih, sahhiittâlmeh, uáivilčalluuh, njunoščalluuh já kirjeárvuštâlmeh.
Kesi- já syeinimáánust Anarâš aavis almostitij čuuvtij eenâb ko táválávt – motomin joba maŋgâ čalluu oovtâ peeivi siste. Tot lii meendu ennuv. Eromâšávt jis váldoo huámášumán tot, et ministeriö minimivátámâššân lii ohtâ čaalâ jyehi nube peeivi. Ohhoost 23 ookon 31 almostuvvii ohtsis 91 čaalâd:
- Okko 23: 10 čaalâd
- Okko 24: 14 čaalâd
- Okko 25: 6 čalluu
- Okko 26: 10 čaalâd
- Okko 27: 18 čaalâd
- Okko 28: 9 čaalâd
- Okko 29: 8 čaalâd
- Okko 30: 9 čaalâd
- Okko 31: 7 čaalâd
Syeinimáánu 4. peeivi almostuvvii vittâ čalluu. Nelji čalluu almostuvvii kesimáánu 10. peeivi, syeinimáánu 5. peeivi já syeinimáánu 26. peeivi. Uđđâseh kieđâvuššii puohlágánijd teemaid, já toi lasseen almostuvvii meiddei ohtâ njunoščaalâ, ohtâ uáivilčaalâ sehe muáddi sahhiittâllâm já muáddi blogičalluu.
Maaŋgâid uđđâsijd čaalijn nuorâ kesitoimâtteijeekyevtis. Sunnust nubbe lâi pargoost kesimáánust já nubbe syeinimáánust. Kesipargo fáálá nuoráid máhđulâšvuođâ uápásmuđ mediamaailmân já uđđâsij čälimân. Ton lasseen kesipargo peht nuorah peesih hárjuttâllâđ jieijâs čäällimtááiđuid. Tot lii eromâš tehálâš anarâškielân, mii ain taarbâš lase čälleid.
Porgemáánust almostittemliähtu lii lamaš oppeet 5–8 kerdid ohhoost, já tot piso vaarâ siämmán ive loopâ räi. Stuárráámuu uási uđđâsijn čáálá tääl toimâttâs, moos kuleh kulmâ fastâ toimâtteijee, mut išetoimâtteijeeh-uv vuolgâtteh uđđâsijd ain tyellittälli.
Mušteđ ain luuhâđ uđđâsijd anarâškielân!
Kove: kalhh (Pixabay)