Paralympialiih láá älgimin Pariisist táválij olympialij maŋa. Lekkâmseremonia tuálloo koskoho porgemáánu 28. peeivi tijme 20.30 Place de la Concordest. Lopâttemseremonia tuálloo Stade de Francest pasepeeivi čohčâmáánu 8. peeivi tijme 20. Pariisin taah paralympialiih láá vuosmuuh, maid kaavpug uárnee.
Paralympialijn paijeel 4 000 valastâlled čokkâneh kištottâllâđ ohtsis 549 miitaalkištoost. Fáárust láá 22 šlaaijâd, ko fáárun rekinistojeh sehe ovtâskâs kištottâllei šlaajah já juávkkušlaajah. Ohjelmlistoost láá čalmevádulij jyelgipállu, boccia-kuulaspellâ, moolâpállu, paratävgipääččim, para-aalmugvalastâllâm, paratolgepállu, paramiällum, pararađepyeráinvyeijim, pararaccastem, parajudo, paravyeimiluptim, parasuuhâm, parapevditennis, parataekwondo, paratriathlon, parapääččim, čokkámtuáškumpállu, rullástovlikooripállu, rullástovlimiähástâllâm, rullástovlirugby já rullástovlitennis.
Suomâ vuolgât paralympialáid 16 valastâlled. Suomâ ovdâsteijeeh kištottâlleh almosvalastâlmist, raccastmist, tävgipäčimist, pyeráinvyejimist, pevditennisist já pääččimvalastâlmist. Suomâ juávkkudâhân lii asâttum vuárdámuš pyehtiđ paralympialijn kuttâ miitaal.
Kištoi válduareenan tuáimá Pariisi kaavpugkuávlu, eereeb iärrás Stade de France (almosvalastâllâm), Pont Alexandre III (triathlon) já Invalides (tävgipääččim). Kištosajeh kávnojeh meid Versailles paalaac kuávlust sehe Seinejuuvâ já Eiffeltoornâ aldasijn. Pääččimkištoh uárnejuvvojeh Chateauroux kaavpugist, mii lii suullân 250 kilomeetterid máádás Pariisist.
Paralympialalijd puáhtá čuávvuđ Suomâst Yle TV2 -kanavast já Yle Areenast.
Käldee:
– Pariisin paralympialaiset 2024 (www.paralympia.fi)
Kove: Chabe01 (Wikimedia Commons)