Kesimáánu algâ lii lamaš uáli jo čuásis, já mánuppaje 1. peeivi Anarist joba muotij mottoom verd. Onne-uv mittár pajaniš paijeel 15 ciäkán tuše Maadâ- já Viestâr-Suomâ riddokuávluin.
Tile kuittâg muttoo oholoopâ ääigi. Lávurduv já pasepeeivi koskâsii iijâ Suomân puáđiškuát lieggâsub áimu maadâviestârist, já ubâ enâmist lii lieggâsub. Áimutiettuu lágádâs meteorolog Piia Rauhamäki mield pasepeeivi puoh lieggâsumos lii viestârriddoost. Kokkola kuávlust liegâs lii suullân 23–24 cekkid. Säämist-uv pasepeeivi lii vyerdimist paijeel 20 cekkid.
Lieggâ kesišoŋŋâ juátkoo vuossaargâ, kuás Maadâ-Suomâst piäsá navdâšiđ suullân 23–24 ceehist. Majebaargâ lii paahâs aainâs-uv Maadâ-Suomâst, kost puáhtá leđe suullân 25–26 cekkid. Koskokko-uv lii liegâs. Talle suullân 25 ceehi lieggâsist puáhtá navdâšiđ ain Jyväskylä aloduv räi. Tuorâstuv šoŋŋâ lii vaarâ siämmáálágán ko koskoho, mut ton maŋa tärhis ennustâsâid lii vala vaigâd rähtiđ.
Nabai jonsahpeeivi šoŋŋâ? Veikkâ jonsahpeiviennustâsah iä lah vala hirmâd lyetittetteeh, te taid puáhtá kuittâg rähtiđ. Foreca meteorolog Anne Latvala mield jonsahpeiviohhoost liegâs lii 20–22 cekkid mäddin, 18–22 cekkid Koskâ-Suomâst ain Maadâ-Laapi räi já suullân 15 cekkid Tave-Laapist.
Latvala muštâl meiddei tom, et jonsahpeeivi räi oroččij lemin koškásub ko táválávt. Viestâr-Suomâst sättih puáttiđ páiháliih arveuávtih, mut tađe eenâb oorvijd ennustâsah iä eidu tääl uáini.
Käldee:
– Helle vyöryy nyt Suomeen – tämä on tilanne juhannuksena (www.is.fi)
Kove: Rosy (Pixabay)