Kanada jieŋâskiärrujuávkku lii vuáittám taan ive jieŋâskiäru maailmmiäštárvuođâ, ko pasepeeivi tot vuoitij finalist Saksa 5–2. Kanadan taat lii 28. miäštárvuotâ, mii lii meid kištoi ulâttâs. Kanada lii ain miänástum pyereest maailmmiäštárkištoin: moonnâm čiččâm ive ääigi tot lii peessâm finalân čiččii já lii vuáittám kollemiitaal neljii.
Tot, et Saksa peesâi finalân, lâi vuod stuorrâ olâttâs. Ovdil taan ive juávkku lâi juksâm tuše kyehti fiinaal jieŋâskiäru maailmmiäštárkištoi historjást: ive 1930 Saksa táppái Kanadan já ive 1953 Viestâr-Saksa táppái Ruotân. Ađai Saksa ij lah vala luhostum vyeittiđ miäštárvuođâ.
Veik Kanada vuoitij fiinaal 5–2, spellâ lâi 1. já 2. uásist uáli čoovgâs. Puáđus lâi 1–1 vuossâmuu uási loopâst já 2–2 nube uási loopâst, mut kuálmád uásist Kanada lâi čielgâsávt pyereeb, já kanadaliih spelleeh luhostuvvii časkeđ kulmâ moolâ já siämmást vyeittiđ ubâ speelâ.
Pronssimiitaal vuoitij Latvia. Pronssifinalist Latvia vuoitij Ovtâstum staatâid 4–3 jotkâääigi. Vuáittumoolâ čooskij jotkâääigi Kristiāns Rubīns. Latvialâš juávkku ij lamaš kuássin ovdil juksâm miitaalsaje.
Suomâ ij piergim siämmáá pyereest ko majemui iivij. Taan tove Suomâ táppái 4–1 Kanadan niäljádâsfinalist.
Käldee:
– International Ice Hockey Federation (www.iihf.com)
Kove: Pete Linforth (Pixabay)