Škovlâihe nohá vuáđuškoovlâst já luvâttuvâst jyehi ive oho 22 majemuu argâpeeivi, lávurduv. Tot kalga leđe vyesimáánu 30. peeivi já kesimáánu 5. peeivi kooskâst. Taan ive kesiluámu älgimpeivi lii kesimáánu 3. peivi.
Ive 2023 pajeuáppen ubâ Suomâst valmâštuvvojii suullân 25 100 uápped. Tot lii suullân 400 uápped eenâb ko kiđđuv 2022. Taan ive pajeuáppeeh finnejeh pajeuáppeetuođâštus meid digitaallii häämist, mii älkkeedit pajeuáppei uuccâmproosees eromâšávt olgoeennâm oppâlágádâssáid. Laapi luvâttuvâin vielgiskappeer uážžuh vááijuv 700 pajeuápped. Pajeuáppeetotkos lasseen maaŋgah nuorah valmâštuvvojeh meid ámáttân tubletotkosáin.
Taan kiiđâ ubâ Suomâst sämikielâ čallii 18 uápped. Viiđâs čallii pajekielâ eenikiellân já oovces viereskiellân. Kihheen ij čáállám anarâškielâ ige nuorttâlâškielâ eenikiellân, mutâ kuulmâs čallii anarâškielâ viereskiellân, já ohtâ uáppee čaalij nuorttâlâškielâ viereskiellân.
Avveel luvâttuvâst valmâštuvvojii 20 pajeuápped. Kulmâ uáppee láá čáállám sämikielâ taan ive Avelist. Ohtâ čaalij pajekielâ eenikielâ já kirjálâšvuođâ, ohtâ pajekielâ já nubbe anarâškielâ viereskiellân, uánihis oppâmmere. Anarâškielâ viereskiellân, uánihis oppâmmere čällei meeri lii lasanâm ive 2018 maŋa.
Škovlâihe álgá masa ubâ Suomâst ohhoost 32. Aanaar kieldâst škovlâ álgá taan čoovčâ porgemáánu 10. peeivi. Puoh škovlâive pargoääigih kávnojeh Aanaar kieldâ nettisiijđoin.
Sonja Valle
Käldeeh:
– Lapissa lakin painaa päähänsä noin 700 ylioppilasta – torniolainen Henni-Marja Berg tienaa yliopiston opiskelurahoja päiväkodin tuurauksilla (www.lapinkansa.fi)
– Inarin kunnan koulut (www.inari.fi)
Kove: Moona Tarvainen (Pixabay)