Anarâškielâ seervist lii eidu almostum Mehis Heinsaar roomaan ”Hiärrá Paavvâl äigikirjeh”, mon Jukka Mettovaara lii jurgâlâm anarâškielân. Taat roomaan kulá Anarâškielâ seervi Tuhháát sijđod nuorâikirjálâšvuotâ ‑proojeekt jurgâlussáid. Proojeekt ulmen lii lamaš noomâs mield almostittiđ kirjálâšvuođâ nuoráid, tastko nuoráid ij ovddiist lah lamaš fáállun ennustkin luhâmuš.
Mehis Heinsaar lii eestilâš kirječällee, kote oovdâst absurdlii huumor, surrealism já maagisii realism. Suu kiirjijn ij veltihánnáá lah rationaallâš loogiik, pic toh čuávuh immâšij loogiik. ”Hiärrá Paavvâl äigikirjeh” almostui virokielân ive 2001 Heinsaar nubben kirjen. Tain kirjijn sun vuoitij Eestieennâm kulttuurruttârááju proosapalhâšume ive 2001. Čuávuvâžžân lii uánihis tekstâčááitus kirjeest:
Jis mun liččim Kristoffer Kolumbus, te mun liäduččim tuše ubâ paje kieđâidân. Meerah láá jo purjâstum já nanameh kavnum, ij must liččii innig mihheen viirgijd. Vissâ eidu tondiet kihheen eres ij liäduččii kieđâidis nuuvt čeepiht ko mun. Mun liččim viehâlágán miäštár jurâttiđ čolmijdân já hammiđ jyelgilapijdânguin kovosijd já ušom mun čáitáččim kuhemuu njuohčâm-uv. Tyellittälli kiinii orostičij muu paaldân, mulgoččij muu já imâštâlâččij, vissâ váhá suttoost-uv ličij. Mut mun tohâludâččim tego jiem uáináččiigin suu. Nuuvt tot lii.
Kirje tábáhtumeh láá vyerdimettumeh, motomin mielâttes hiärvááh, ige tain oro lemin mihheen jiermijd. Absurd juurdâ lii tot-uv, et taam kirje kalga vistig luuhâđ ovdilgo tom äddee.
Kirje puáhtá tiiláđ seervi mediapargest (fabrizio.brecciaroli@gmail.com). Tom puáhtá meiddei uástiđ Duodji Shopist Sajosist já Sämimuseo Siidast. Ennuv luuhâmmohtâ uđđâ kirjijn!
Kove: Fabrizio Brecciaroli