Aanaar Pride uárnejuvvoo Aanaar markkânist lávurduv porgemáánu 2. peeivi 2025. Taan ive tábáhtus virgálâžžân suojâleijen lii čurmâdâttee Elina Gustafsson. Sun puátá pääihi oolâ tábáhtusân.
Aanaar Pride -tábáhtus uárnejuvvoo taan ive niäljád keerdi Aanaar markkânist, já tot loptee uáinusân seksuaal- já suhâpeliucceeblovoi vuoigâdvuođâid.
– Tääl jis kuássin lii tehálâš čuážžuđ olmoošvuoigâdvuođâi peln, já lii ilo uásálistiđ Aanaar Priden já leđe taan tábáhtus suojâleijee, láá Gustafsson tiervuođah aanaarláid.
Teeman torvolub Aanaar
Vuossâmuš Aanaar Pride uárnejui ive 2021 Aanaar kieldâ nuorâirääđi tooimâst. Taan ive teeman lii torvolub Aanaar, já orniistâlmijn västid iävtutátulij rävisulmui pargojuávkku. Vuossâmuu tábáhtus várás nuorah rahtii torvolub saje njuolgâdusâid, moh láá ain vyeimist tábáhtusâst.
– Mij puohah vissásávt tuáivup torvolub Aanaar aaibâs juáhážân. Ohtâgin seksuaal- tâi suhâpeliucceeblohon kullee olmooš ij koolgâ feeriđ olgoštem tääl teikkâ puátteevuođâst, čielgee nuorâipargee Ida Lassila, kote lii lamaš fáárust tábáhtus orniimist aalgâ rääjist.
Ohjelmist vuossâmuš Pride-ruossâlistem Anarist
Aanaar Pride ohjelm álgá tijme 10 lihâdâspargopaajijn škovlâkuávdáš Šielâst. Koskâpeeivi ääigi Pride-ráiđuväzzim vuálgá Sämimuseo Siida šiljoost já nohá torikuávlun. Torin uárnejum peiviohjelm lii nuuvtá, ige tobbeen uážu kevttiđ uáivádâsâid. Ohjelmist láá eres lasseen saavah, muusik já improteatter. Peivi čokkeluvá tijme 17, ko Siida riddoost vuálgá Pride-ruossâlistem. Ruossâlistem uárnejuvvoo oovtâst Visit Inarijn, já tohon kalga uástiđ liipu. Taampâst láá muusikoovdânpyehtimeh já A-vuoigâdvuođah. Pride-jotkâjuhleh rävisulmuid láá ehidist PaPaNa-baarist, kost páiháliih artisteh čuojâtteh.
Aanaar Pride -tiimi
Koveh: Aanaar Pride -tiimi (artikkâl kove) já Oskari Ranta (kove Elina Gustafssonist)