Anarâš aavis lii tyellittälli čáállám meid valastâlmist. Lii suotâs, et kielâ puáhtá kevttiđ maaŋgânáál, mut tot puáhtá fárustis meid terminologisijd čuolmâid. Ohtâ taggaar čuolmâ lii lamaš suomâkielâ idiom ”tehdä maali”.
Talle ko koččâmuš lii aktiivlii tooimâst, te muu mielâst jyelgipáálust já jieŋâskiärust puávtáččij kevttiđ vaastân pääččiđ teikâ päjistiđ moolâ. Jyelgipálluspeelâst moolâ puáhtá meid čievčâstiđ, ađai volliitteijee čievčâstij moolâ. Talle ko koččâmuš lii jieŋâskiärust, te pääččiđ– já päjistiđ-veerbâi lasseen puávtáččij pyereest kevttiđ meid časkeđ-veerbâ tondiet ko skiärru mana moolân maila peht. Päjistiđ muštâl tast, et pállu teikâ skiärru mana älkkeht já jotelávt moolân. Máhđulávt, jis koččâmuš ij lah aktiivlii tooimâst, mut eenâb-uv puátusist, puávtáččij kevttiđ meid finniđ moolâ, ovdâmerkkân Suomâ finnij kyehti moolâ vuosmuu tijmepele ääigi.
Statistiik puávtáččij almottiđ luoštum já paččum moolâid.
Sämikielâst láá eenâb-uv veerbah suomâkielâ tehdä-veerbâ vaastân, mut rähtiđ-, porgâđ– já toohâđ-veerbah iä heivii kiävtun moolâi ohtâvuođâst.
Kove: smanases (Wikimedia Commons)