Beryl-hirmosstormâ lii stäjidâm Karibia – aainâs-uv vittâ ulmuu láá jáámmám

Beryl-nommâsâš hirmosstormâ huurgij Karibiameerâ čoođâ algâohhoost. Tot tovâttij moive maaŋgâin suolluin. Grenadast, Saint Vincent já Grenadiinest sehe Venezuelast vittâ ulmuu láá jáámmám hirmosstoormâ keežild. Ennustâsâi mield Beryl juksá Jukatan njargâeennâm Meksikost syeinimáánu 6. peeivi.

Beryl lii kiävrum nuuvt ennuv, ete tast lii šoddâm joba viiđâd luoka hirmosstormâ. Viiđâd luokka lii puoh kievrâmus luokka Saffir-Simpson ciäkkáduvvâst. Viiđâd luoka hirmosstoormâi piegah posoh paijeel 70 meetterid sekundist. Vâi trooppisâš stormâ šodâččij vuossâmuu luoka hirmosstormân, ton piegah kalgeh possoođ 33 meetterid sekundist.

Ovtâstum staatâi aalmuglii hirmosstormâkuávdáá mield Beryl lii uáli spiekâstâhlâš taan ääigi ivveest. Beryl lii mittedemhistorjá arâdumos hirmosstormâ, mii lii pajanâm viiđâd luokan Atlant väldimeerâst, já vuossâmuš hirmosstormâ, mii lii ovdánâm niäljád luokan kesimáánu peln.

Hirmosstoormah šaddeh trooppisii vyeligisteddust meerâ paajaabeln peeivitäsideijee aldasijn. Atlant väldimeerâst puoh aktiivlumos hirmosstormâpaje lii porge- já čohčâmáánust. Hirmosstoormah šaddeh tuše meerâ paajaabeln já tuše talle ko čääci lii ucemustáá 26 cekkid liegâs. Ađai täst ij taarbâš poollâđ tave-Euroopist. Hirmosstoormah pišteh táválávt kuttâ peeivi, já távjá taid puáhtá ennustiđ jo maŋgâ peeivi ovdil toi puáttim.

Hirmosstoormah tovâtteh rášuoorvijd, korrâ piegâid já stuorrâ pááruid. Arveh já piegah tuššâdeh riddokuávluid, mut stuárráámus uási uuhrijn jäämih julmes páárui tiet. Luhhoost enâmeh, moh painâšuveh hirmosstormáid, mättih onnáá peeivi pyereest rahttâttâđ toid.

Käldeeh:

– ”Äärimmäisen vaarallinen ja harvinainen” Beryl-hurrikaani lähestyy Karibiaa (yle.fi)

– Karibianmerellä tuhoa kylvänyt hurrikaani Beryl etenee kohti Meksikoa – Grafiikka näyttää todennäköisen reitin (www.hs.fi)

– Hurricane Beryl charges toward Jamaica as record-breaking Category 5 after leaving Caribbean islands in ruins (edition.cnn.com)

– ‘Please send help’: Caribbean reels from Hurricane Beryl devastation (www.theguardian.com)

Kove: NASA/Matthew Dominick

Kommenteh

Čääli komment

Kirjoita kommenttisi!
Kirjoita nimesi tähän

Luuvâ meid

Uđđâsumos uđđâseh

Etna lii oppeet rusomin – kirdemjotolâh Catania kirdemkiedist koskâlduttum

Nuorttâ-Sisilia tevdui koovjâin majebaargâ, tastko Euroop stuárráámus aktiivlâš tullâvääri Etna rusoi suullân käävci kilomeetterid ollâ kovjâpoolvâ Sisilia oolâ. Kovjâ laavdâi pirrâ Etna kuávlu, meiddei...

NASA vuolgâttij ráp-muusik Venusân, mätki piištij suullân 14 minuttid

Ovtâstum staatâi komovuotâhaldâttâh NASA vuolgâttij ovtâstumstaatâlii ráp-artist Missy Elliott pitá komovuotân. NASA tiäđáttâs mield radioanteneh Kaliforniast vuolgâttii Elliott pitá "The Rain (Supa Dupa Fly)"...

Ovtâstum staatâi tááláš president Joe Biden kiäsádât presidentkištoost

Ovtâstum staatâi 46. president Biden almottij miärádâsâstis aalmugân syeinimáánu 21. peeivi viestâpalvâlus X:st: "Tii presidentin toimâm lii lamaš muu eellim stuárráámus kunnee." Biden čaalij...

Piäluštâsvuoimij hárjuttâs tiävdá Aanaar meecijd suáldáttijguin syeinimáánu 22.–26. peeivi

Suomâ piäluštâsvyeimih uárnejeh jáágárpriikaat kiärgusvuotâohtâduv RYSKE-hárjuttâs Kaamâs já Njiävđám meecijn. Hárjuttâs álgá vuossaargâ, syeinimáánu 22. peeivi, já tot nohá vástuppeeivi, syeinimáánu 26. peeivi. Hárjuttâsân uásálisteh...

Eellim jorgálduvah Ukraina suáđi ovdâlinjáást – suomâruátálâš Ralf Sirén muštâl jieijâs fiäránijn rijjâtátulâš taištâleijen

Ralf Sirén lii pajeláhháá 30-ihásâš ovdedemhovdâ, kote parga uđâsmuvvee energia stuorrâirâttâsâst. Suu eellim lii lamaš eromâš, tastko sun lii soottâm rijjâtátulâžžân Ukraina suáđi ovdâlinjáást...