Google Translate -jurgâlempalvâlusân lasettuvvojii 110 uđđâ kiellâd, já ohtâ tain lii tavesämikielâ. Jurgâlempalvâlus peht puáhtá tääl jurgâliđ tavesämikielâst eres kieláid sehe eres kielâin tavesämikielân.
110 uđđâ kielâ lasettem lii stuárráámus vijđedem kuássin Google Translate -palvâlusâst, čáálá Google tiäđáttâsâstis. Kielâfalâlduv vijđedem várás kevttui tahojiermi.
Uđđâ kielâi lasettem addel jurgâlemmáhđulâšvuođâ paijeel 614 miljovn ulmui, mii lii suullân 8 prosentid ubâ maailm viehâduvâst. Uási kielâin láá stuorrâ váldukielah, main láá paijeel 100 miljovn sárnod. Uási tain vist láá algâaalmugkielah, main láá uccáá sárnooh. Motomijn lasettum kielâin iä lah masa ollágin eenikielâliih sárnooh, mutâ tain lii joođoost aktiivlâš iäláskittempargo. Tággáár kielâ lii ovdâmerkkân manksikielâ. Tot lii kelttilâš kielâ, mii sárnoo Mansuollust. Manksikielâ majemuš eenikielâlâš sárnoo jaamij ive 1974, mut iäláskittempargo áánsust kielâst láá tääl tuhátteh sárnooh.
Suullân niäljádâs uđđâ kielâin sárnojeh Afrikist. Afriklijn kielâin Google Translate -palvâlusân láá lasettum eres lasseen fon, kikongo, luo, ga, swati, venda já wolof. Eres uđđâ kielah láá ovdâmerkkân kalaallisut (enâmustáá sarnum inuitkielâ Ruánááenâmist), färkielâ, tok-pisin (kreolikielâ, mii vuáđuduvá eŋgâlâskielân já sárnoo Papua Uđđâ-Guineast) sehe tagareh suomâ-ugriliih kielah ko komi- já udmurtkielâ. Listo tääl Google Translate -palvâlusân lasettum kielâin kávnoo tääbbin.
Google Translate -jurgâlempalvâlusâst láá paijeel 600 miljovn kevtted ubâ maailmist.
Käldeeh:
– Google Translate bastá dál jorgalit davvisámegillii (yle.fi)
– Google Translate davvisámegillii (www.nrk.no)
Kove: Jasmina Schreck