Kištoh lijjii Laapi kuávlu miäštárkištoh, já tobbeen kištottâllii 30 juávhudâhhâd viiđâ juávhust: peerâvárdájeijeeh (4–6-ihásiih), čiivgah (7–10-ihásiih) já puohajeijeeh (10–13-ihásiih) sehe vyettei (12–17-ihásij) kyehti juávhu, ooraans já ruánáá. Ooraans juávhust kištottâlleh nieidah. Ruánáá juávhust vist fáárust láá meiddei kaandah. Juvduuvääri vuovdâst kištottâllii 154 pärnid já nuorrâd. Šoŋŋâ lâi pyeri, mut sijvo lâi uásild njuoskâs. Kumistevileh lijjii-uv uáli anoliih.
Tävgi-kištoh lijjii puátimin Anarân jo ive 2020, mut koronapandemia keežild taid koolgâi sirdeđ vistig ovttáin ivvijn ovdâskulij já talle macâttiđ ollásávt. Täävgist lâi valdum huámášumán páihálâš kulttuur. Pargopittán lijjii ovdâmerkkân koškepuško já eres amnâsij smakkiistem, várdámsánádâh kuulmâ sämikielân, elleeluodâi tubdâm já sämikááhui liäibum trangiain. Smakkiistem-rasti lâi rahtum oovtâst Martaigijn, já meid Meccihaldâttâs olášutij oovtâ pargopitá puurrâmrääsist.
Kištotalkoolijn lijjii fáárust 72 rijjâtátulâžžâd Anarist, Avelist, Ucjuuvâst já eres Laapi kuávluin. Talkoolijttáá kištoh iä liččii luhostum, tastko várdám jorá rijjâtátulij vuoimijgijn. Aanaar tuodârkuumpih kijtteh puoh rijjâtátulijd já kištottâlleid.
Moonnâm keerdi Aanaar kieldâst lijjii várdámtáiđukištoh ive 2015. Talle toh uárnejuvvojii Avelist noomáin Jänkäpeikon jotos.
Kove: Katri Kittilä