Moonnâm oho lieggâ šooŋah láá pajedâm čaasijd maaŋgâ saajeest Suomâst nuuvt ennuv, et láá šoddâm tulveh. Suomâ tulvekuávlu jotá Kainuust tavemuu Laapi räi. Jaavrijn já juuvâin čääci lii pajanâm nuuvt čuuvtij, et vijđásub kuávluh sehe luodah já jotteemkiäinuh láá pááccám čääsi vuálá. Laapi stuorrâ juuvâi riddoin meid aassâmvisteh äštih njuoskâđ. Avveeljuuvâ já Ounasjuuvâ aseh láá pajanâm koskâmiärálij tulverajij paajaabel, Kittâlist vaahâgrääji aldasáid. Tobbeen aiccâmsajattâh lii pasepeeivi vuálgám jieŋâi fáárun. Tuárnusjuuvâst čääci lii pajanâm Pajetuárnusist Poikkilahdentie oolâ, já luoddâ lii kiddejum.
Tego kooveest uáiná, Avelist kirdemkiädán mannee keppâ jotoluv vävli lii kiddejum, tastko tot lii pááihui pááccám čääsi vuálá.
Meiddei Nááváárnjaargâst čääci lii pajanâm nuuvt čuuvtij, et Nááváárnjaargân mannee luoddâ lii kiddâ. Juha Poorti väldim uđâskooveest uáinoo, maht Avelist Ivalo River Camping sävni lii pááccám čääsi vuálá. Huuhkajast lii meid tulvâm. Avelist Henrikintiest láá lamaš piäluštempargoh tulve keežild. Tobbeen tulve pirâstitij nelji autost čokkájeijee ulmuu. Laapi piäluštemlágádâs káájui sii kárbáin.
Šooŋah láá algâohhoost čuáskum ubâ Laapi kuávlust, mii hiđásmit čaasij kulgâm, já taat vaaigut positiivlávt tulvetilán.
Vuossaargâ vuástásii iijâ čääci lii lyeštiškuáttám já vuárdoo, et tot ain luáštá. Vuossaargâ Avveeljuuhâ lâi tulvâm kulmâ meetter, jis tom verdid kesiääigi čääsi alodâhân.
Käldeeh:
– Tulvavesi nousee yhä Lapissa: neljän hengen autoseurue jäi veden saartamaksi Ivalossa – pelastuslaitos haki veneellä (yle.fi)
– Tuoreet katsaukset vesitilanteesta (www.vesi.fi)
Koveh: Juha Portti (uđâskove), Ritva Mikkola (pyeráluoddâ) já Outi Portti (piäldu)