Louhivesist Mikkelist láá maaŋgâlov ive maŋa oppeet šoddâm saimaanuárjučiivgah. Rävissaimaanuárjuh lijjii oinum Louhivesist jo muádi ive ääigi, mut taan kiiđâ huámmášui, et nelji nuárjučiivgâ lijjii šoddâm kuálástemraijimkuávlui ulguubel teikkâ tai räjikuávluin. IJP-kuávdáš áigu forgâ algâttiđ ráđádâlmijd čäcikuávlu omâsteijee uásálâškudijguin kuálástemraijimkuávlu viijđedmist.
IJP-kuávdáá tiäđáttâs mield nuárjučiivgâi cevzim váátá viermikuálástemkiäldu syeinimáánu räi. Ton lasseen nuárjoid vaarâliih pivduseh kolgâččii kielduđ pirrâ ive.
Tave-Savo IJP-kuávdáá njunoš kyelituáluäššitobdee Teemu Hentinen iätá, et Louhivesi lii pivnohis kuálástemkuávlu keessiv. Sun osko, et ráđádâlmeh uásálâškudijguin maneh pyereest.
− Lii kuittâg máhđulâš kuálástiđ eres-uv ääigi já muulsâiävtulij niävuiguin. Ijhân kuálástemraijimkuávlu vijđedem meerhâš tom, ete kuálástem ferttee joskâđ ollásávt.
Louhivesi lasseen uđđâ kuálástemraijiittâsâin ráđádâlloo Maadâ-Saimaast sehe Sulkava aldačaasijn. Tain kuávluin láá kiđđuv kavnum nuárjučiivgah uáli alda kuálástemraijimkuávlui rääji. Saimaanuárjunääli stuárrum áánsust nuárjuh láá maccâm pessiđ kuávloid, kost toh lijjii ovdil lappum ulmui tooimâi tiet.
Sopâmušah uđđâ kuálástemraijimkuávluin iä šoodâ tállán. Louhivesist tuállojeh čuákkimeh vyesimáánust, já lii vyerdimist, et uđđâ raijiittâsah puátih vuáimán eskin kesi-syeinimáánust. Tondiet IJP-kuávdáš pivdá páihálijd kuálásteijeid velttiđ viermikuálástem rijjâtátulávt kiiđâ já algâkeesi ääigi. Hentinen osko, ete kuávlu kuálásteijeeh nuávditteh IJP-kuávdáá tuoivuu.
− Kihheen ij vissásávt haalijd kavnâđ nuárju viermistis, Hentinen iätá.
Käldee:
– Saimaannorpan kuutti syntyi pitkästä aikaa Louhivedelle – nyt kalastusrajoitusaluetta pitää laajentaa (yle.fi)
Kove: Jasmina Schreck