Anarâškielâ servi lii almostittám uđđâ kirje: astronaut André Kuipers arânuorâi science fiction ‑kirje Koodi ruopsâd! (hollandkielân Code Rood!) almostui pasepeeivi roovvâdmáánu 8. peeivi. Kirje almostittemtilálâšvuotâ lâi Euroop komovuotâornijdume ESA já ton tutkâmlágádâs ESTEC ávus uvsâi peeivi Noordwijkist Vuáládâhenâmijn. Taat kirje lii jotkâ kiirján 3, 2, 1, GO!, mii almostui anarâškielân uđđivemáánust talle ko astronaut André Kuipers lâi kolliistâlmin Anarist já Avelist. Kirje lii jurgâlâm hollandkielâst Marja-Liisa Olthuis.
Almostittemtilálâšvuotâ lâi uárnejum ávus uvsâi peeivi ehidispiäiván párnái já nuorâi teivâdem ohtâvuotân. Tien ohtâvuođâst párnááh ožžuu koijâdiđ André-astrounautist komovuotân kyeskee aašijn. Taan tijmepele loopâst jurgâleijee puávdejui läävdi oolâ, já sun uážui muštâliđ härvinâš já uhkevuálásii kielâst já tast, et anarâškielân láá esken tääl almostuuškuáttám eenâb kirjeh párnáid já nuoráid.
Koodi ruopsâd! ‑kirje lâi meiddei šoddâmpeivilähji André-astronautân, ko sun teevdij 65 ihheed roovvâdmáánu 5. peeivi. Kirje almostittemtilálâšvuotâ lâi kuittâg pyereest varjâlum olâttâs, mast sun poođij tiettiđ esken almostittem ohtâvuođâst.
Kirje puáhtá uástiđ Anarist Säämi Tyejeest, Siidast já Anarâškielâ seervist.
Koveh já vuáđulub maainâs Anarâš aavisân ESA já ESTEC ávus uvsâi peeivist láá forgâpalij puátimin.
Koveh: Fabrizio Brecciaroli (kirje) já Helen Kuipers (almostittemtilálâšvuotâ)