Euroop parlament tuhhiittij čohčâmáánu tievâsčuákkimist rääđi iävtuttâs puáttee Euroop parlament sajemeereest. Vaaljâpajan 2024–2029 parlamentân puátih 15 lasesaijeed, main ohtâ adeluvvoo Suomân. Puáttee eurovaaljâin Suomâst väljejuvvojeh ohtsis 15 parlamentjesânid ovdebái 14 jeessân sajan. Ohtsis jesâneh väljejuvvojeh 720, ko toimâpaajeest 2019–2024 parlamentist láá lamaš 705 jesânid. Euroop parlament jesâneh kočoduvvojeh meid meppin (Member of Parliament). Eurovaaljah tuállojeh kesimáánu 9. peeivi 2024. EU-staatâi aalmugjesâneh väljejeh Euroop parlament jesânijd njuolgâ vaaljâigijn, moh uárnejuvvojeh jyehi viiđâd ive. Majemuuh vaaljah uárnejuvvojii vyesimáánust 2019.
Euroop parlament lii njuolgâ vaaljâigijn väljejum EU-orgaan, mast láá laavâasâttem-, kocceem- já budjetovdâsvástádâsah. Tot västid oovtâst Euroop rääđist čokkâneijee EU-enâmij haldâttuvâi ovdâsteijeigijn EU laavâasâttem tuhhitmist. Euroop parlament já Euroop rääđi kalgeh peessâđ ovtuáivilân EU jyehi-ihásii budjetist. Parlament jesâneh koceh EU toimâorgaanij já eromâšávt tooimânpieijâmvääldi kevttee Euroop komissio tooimâ.
Euroop parlament toimâsajeh láá Strasbourgist Ranskaast, Brysselist Belgiast já Luxemburgist.
Käldeeh:
– Sirpa Pietikäisii uđâsreivâ 15.9.2023 (uutiskirje.sirpapietikainen.eu)
– Tietoa parlamentista (www.europarl.europa.eu)
Kove: dimschu (Pixabay)