Jyehi čohčâtäälvi nommâtotkeeh väljejeh ive noomâ Nommâtutkâm peeivij ääigi (su. Nimistöntutkimuksen päivät) Helsigist. Ive nommâ lii palhâšume, mii adeluvvoo ohtii ivveest pyere, táválávt uđđâ noomân. Palhâšuumijn nommâtotkeeh halijdeh pyehtiđ oovdân luhostum nommâvaljiimijd já muštottiđ tast, mon teheliih noomah láá mii puohâi elimist.
Ive noomâ väljejeh Nommâtutkâm peeivij uásálisteeh čiččâm finalist juávhust. Noomâid puáhtá kuittâg iävtuttiđ kii peri. Ive nommâ puáhtá leđe maggaar peri uđđâ teikâ mudoi äigikyevdilis nommâ, mii lii iävtutteijee mielâst pyeri. Tot puáhtá leđe veikâba pääihi, ulmuu, finnoduv, viäsu teikâ monnii pyevtittâs nommâ. Noomâ kielâ-uv puáhtá leđe mii peri, meiddei sämikielâ teikâ tast pyehtih leđe maaŋgah kielâversioh. Ovdâmerkkân ive 2021 iävtukkâssân lâi sämmilij arkkâdâhamnâstuvâi uuccâmportaal Nuohtti.
Noomâ puáhtá iävtuttiđ 1.10.2023 räi suomâkielâg nettiluámáttuvváin. Iävtuttum noomâ pyerivuođâ ferttee luámáttuvâst agâstâllâđ. Noomâ merhâšuumeest, tuáváást teikâ ton väljimprosesist puáhtá meid adeliđ lasetiäđuid, ovdâmerkkân puáhtá adeliđ liiŋkâ motomáid nettisijđoid. Finalistijd väljejeh Nommâtutkâmpeeivij uárnejeijeeh. Mušte, et pyeri agâstâllâm lii peeli vuáitust!
Taan ive nommâ almostuvá Nommâtutkâm peeivij ääigi vástuppeeivi 10.11.2023.
Ive nommâ lii väljejum ive 2017 rääjist. Ive 2022 vyeittee lâi Eläinsairaala Savon Murre. Eres vyeitteeh láá lamaš: Koronavilkku ‒ Coronablinkern (2021), Tikkurilan kirkko ‒ Dickursby kyrka ‒ Tikkurila Church (2020), Liisankatu ‒ Elisabetsgatan (2019), Helsingi Sõnumid, Maaelu Tulevik ja Pealinnaleht (2018) já Tampereen yliopisto (2017).
Taarna Valtonen
Käldee:
– Vuoden nimi (blogs.helsinki.fi)
Kove: Nuohtti