Várdámtooimâ čohčâpaje algâ forgâ. Henna Tervaniemi muštâlij sahhiittâlmist porgemáánu aalgâst, mii sämivárdámtooimân Anarist já Avelist kulloo.
Henna iätá sahhiittâlmist, ete čohčâpaje álgá porgemáánu loopâst. Vuossâmuš teivâdem lii majebaargâ 29.8. tme 17.30–18.30. Vuáváámeh lijjii vala váhá koskân talle ko muoi savâstâláim, mutâ sundáttâllâm lii joođoost.
Várdámtooimâst láá fáárust suullân 10–20 várdájeijed, mutâ ij lah vala vises, ete kiäh juátkih já kalle párnáá algâtteh uđđâ puđâldâs taan čoovčâ. Henna Tervaniemi, Tiina Lehmuslehti já Kikke Klaver stivrejeh várdámtooimâ meiddei taan ive.
Sämivárdámtooimâst vuáđđun lii sämmilâšvuotâ. Tot uáinoo ovdâmerkkân tast, ete toimâ lii sämikielân já teivâdmij ääigi várdájeijeeh sierâdeh já puohajeh ennuv olgon. Sämivárdámtooimâst láá sehe anarâškielâliih já tavesämikielâliih párnááh fáárust.
Henna lii tuđâvâš toos, ete várdájeijeeh láá finnim jo motomijd anarâškielâlijd materiaalijd. Tääl lii Čiivgâ luodah -kirje almostum teddilum version, mii lii šiev äšši.
”Digitaalliih materiaaleh láá tiäđust-uv pyereh, mutâ párnááh tarbâšeh meiddei fyysilijd materiaalijd”, iätá Henna.
Tiervâpuáttim Aanaar tuodârkuumpij čohčâpaje algâteivâdmân 29.8.!
Čohčâpaje álgá 29.8. tme 17.30–18.30, ko algâteivâdmeh uárnejuvvojeh sehe Anarist já Avelist. Aanaar teivâdem lii servikoddetáálust já Avveel teivâdem saje lii Tökäri, Avveel vuággu. Teivâdmeh láá Aanaar tuodârkuumpij (su. Inarin Tunturisudet) ohtâsâš tábáhtumeh. Puohah láá tiervâpuáttám uápásmuđ várdámtooimân!
Kove: Henna Tervaniemi