Indialâš Chandrayaan-3-luođân luhostui koskoho siäivuđ mánudáá maadânäävi alda. Ovdil India tuše Ovtâstum staatah, Sovjetlitto já Kiina láá luhostum siäivuđ mánudâžân luođânáin. Oovdeb keerdi tast luhostui Kiina ive 2018 Chang’e 4 -luođânáin, mii lâi meid vuosmuš, mii peesâi mánudáá sevŋis piälán.
India oovdeb irâttâsâst keevâi hyeneeht: ive 2019 vuolgâttum Chandrayaan-2 pieđgânij talle ko tot teeivâi mánudáá asan. Taan keerdi indialiih luhostuvvii viijmâg nuuvt kočodum timmâ siäivumist, ađai tast ete luođân siäilu toimânavcâlâžžân siäivum maŋa. Luođânist já ton fáárust puáttám muávlost lii tárguttâs nuurrâđ tiäđuid 14 peeivi ääigi, jis puoh mana vuávám mield. India komovuotâtutkâmušorganisaatio (ISRO) mield lii kuittâg máhđulâš, ete tot puáhtá toimâđ vala 14 peivid lase. Mánudáá maadânääpi lii tolebáá tutkâmettum kuávlu já India komovuotâtutkâmušorganisaatio mield uáli mielâkiddiivâš tutkâmušlávt, tastko tot lii uásild suoivust, mii lasseet tuođânálásâšvuođâ jieŋâčáittusij finniimist. Jieŋâ kavnum ličij tergâd, vâi mánudáást puávtáččij máhđulávt leđe motomin olmoošaassâm.
Rakkeet, mii vuolgij Srihakota komovuotâhamânist syeinimáánust, siskeldij kulmâ tieđâlii instrument: muávloo, mii jotá tutkâmuškuávlust já norá tiäđuid pirrâsistis; siäivoo, mii jođettij muávloo já siskeeld jieškote-uvlágánijd tieđâlijd piergâsijd; já jođettemmooduul, mii jođettij siäivoo mánudáá juurrâmrađan já paasij toho porgâđ tutkâmuš eksoplanetijn. Jođettemmodulân paasij eenâb puáldimaamnâs ko lâi arvâlum, te ij lah vala vises, ete mon kuhháá tot tuáimá, mut tot sáttá leđe joba motomijd iivijd.
Meid Ruoššâ irâttij finniđ luođânis mánudáá maadânáápán, mut Ruošâ komovuotâornijdume Roskosmos almottij moonnâm oho pasepeeivi Telegram-kanavastis, ete ton Luna 25 -luođân lâi teivâdâm mánudáá asan já pieđgânâm. Roskosmos lâi lávurduv iđedist almottâm, ete luođân lâi karttâm ”epinormaal tilán”, mut ääši tuođânálásâšvuođâst ij lamaš talle vala tiätu. Ohtâvuotâ luođânân lâi monâttum lávurduv ehidispeeivi, já ucâmij maŋa kavnâttui, ete luođân lâi pieđgânâm. Luna 25 lâi meid tárguttâs tutkâđ mánudáá čäcijieŋâitosijd siämmáá kuávlust ko tääl Chandrayaan-3. Ruošâ já India luođânprojektij kooskâst lii-uv lamaš mottoom verd kištottâllâm, já tääl puáhtá ettâđ, ete India lii ”vuáittám” kišto mánudáá maadânáápán. Ruoššâ lii irâttâm iäláskittiđ Sovjetlito áigásâš komovuotâtutkâmuš, mut viestârenâmij teknologiapáguttâsah láá hettim tom. Euroop komovuotâornijdume (ESA) lâi algâalgâlávt fáárust Luna 25 -projektist, mut kiäsádâđâi tast cuáŋuimáánust 2022, ko Ruoššâ lâi masa kyehti mánuppaje tolebáá volliittâm Ukraina.
Käldeeh:
– Intia lähetti onnistuneesti avaruusluotaimen kohti Kuuta – aluksen on tarkoitus laskeutua aiemmin tutkimattomalle alueelle (yle.fi)
– Intia laskeutui onnistuneesti Kuuhun neljäntenä valtiona ihmiskunnan historiassa (yle.fi)
– Kuuhun laskeutumista yrittänyt Venäjän luotain törmäsi Kuuhun, tuhoutui täysin (www.hs.fi)
Kove: Arek Socha (Pixabay)