Sämitigge áigu orniđ kyehti sovâdâttâmteema miäldásii savâstâllâmtilálâšvuođâ roovvâdmáánu aalgâst Anarist. Tilálâšvuođah láá uáivildum sierâ puávdejum sämiseervij jesânáid, já toid kalga almottâttâđ muuneeld.
Savâstâllâmtilálâšvuođâi ulmen lii kuullâđ sämisiärvus uáinuid tast, moi iävtuiguin sovâdâttâmpargo kolgâččij jotkuđ Sämmilij tuotâvuotâ- já sovâdâttâmkomissio loppâraapoort maŋa já maid sovâdâttâm meerhâš sämiaalmugân.
Sämitigge tuáivu sämisiärvusist vijđes uásálistem, vâi savâstâlmijn kulluuččii jieškote-uvlágáneh uáinuh. Pääihi alne láá meid Sämitige stiivrâ ovdâsteijeeh kuldâlmin siärvus uáinuid já uásálistmin savâstâlmân.
Tilálâšvuođâin ráhtoo jienâpäddi, maid Sämitigge kiävttá iššeen tuotâvuotâ- já sovâdâttâmpargo jotkâvalmâštâlmist. Čuákánkiäsuh, moh ráhtojeh jienâpäädist, kieđâvuššojeh nomâttemmin.
Tilálâšvuođah uárnejuvvojeh Anarist Saijoos Solju-salist. Toid puáhtá uásálistiđ meiddei káidusin Zoom peht. Vuossâmuš tilálâšvuotâ lii tuorâstuv 1.10. tijme 17–19.30, nubbe vist tuorâstuv 8.10. tijme 17.00–19.30. Savâstelleeh pyehtih uásálistiđ jo-uv kuohtuid tilálâšvuođáid teikâ tuše nuubán.
Anarâškielâ seervi jeessân: návt tun puávtáh uásálistiđ
Tilálâšvuođah láá áávus tuše tiätu sämiseervij jesânáid. Anarâškielâ servi lii ohtâ puávdejum seervijn.
Jis tun lah Anarâškielâ seervi jeessân já halijdah uásálistiđ tilálâšvuođáid, te vääldi ohtâvuođâ siärván (anaraslosta@anaraskielaservi.fi). Tunjin vuolgâttuvvoo šleđgâlâš Forms-luámáttâh, mon peht tun peesah almottâttâđ.
Almottâttâm nohá 29.9. tijme 17.00.
Käldee: Sämitige povdiittâs sämiservijd
Kove: Sämitigge
Uuđâs peividum 23.9.2026 tme 16.30: Uđđâsân lasettum almottâttâm nuuhâmäigi.