Tave-eennâmlâš sämikielâ kielâpalhâšume Kollekielâ juáhhoo oppeet taan ive. Palhâšumán puáhtá iävtuttiđ finnejeijee čohčâmáánu 1. peeivi räi. Sämitigge já riehtiministeriö tieđettii ääšist majebaargâ.
Kollekielâ-palhâšume mieđettuvvoo ovtâskâs ulmui, juávkun teikâ ornijdâhân, kote lii ovdedâm sämikielâi sajaduv tâi kevttim merhâšitteht. Tom láá vuáđudâm ive 2004 Suomâ, Ruotâ já Taažâ sämiaašijn västideijee ministereh sehe tai staatâi Sämitiigij saavâjođetteijeeh. Palhâšume juáhhoo jyehi nube ive, ađai taaijuv palhâšume juáhhoo 12. keerdi.
Palhâšume árvu lii 15 000 eurod. Ton ulmen lii tuárjuđ sämikielâi ovdedem já siäiludem Suomâst, Ruotâst, Taažâst já Ruošâst.
Palhâšume njuolgâdusâid já ovdebijd vyeitteid puáhtá luuhâđ Sämitige siijđoin. Vuossâmuu palhâšume ive 2004 vuoittii oovtâst Ella Holm Bull já Anarâškielâ servi. Bull (1929–2006) poorgâi maadâsämikielâ pyerrin.
Iävtut palhâšume finnejeijee
Kielâpalhâšume puáhtá mieđettiđ ovtâskâs ulmuid, juávhoid, siärvusáid, servijd teikâ lágádâssáid, kiäh teikâ moh láá porgâm iäljárávt já merhâšitteht sämikielâi ovdedem pyerrin čaalâlávt, njálmálávt teikâ eres häämist. Palhâšume puáhtá jyehiđ meid maaŋgâ palhâšume finnejeijee kooskâ.
Iävtuttâsâid pyehtih toimâttiđ ovtâskâs ulmuuh, siärvuseh, lágádâsah já virgeomâhááh. Iävtuttâs čalloo kirjálávt, já toos puáhtá lahteđ enâmustáá kyevti siijđo kukkosii vuáđustâllâm.
Iävtuttâsâid kalga toimâttiđ majemustáá 1.9.2026 jo‑uv šleđgâpostáin tâi poostâ peht máttááttâs- já kulttuurministeriön.
Šleđgâpostâčujottâs: kirjaamo.okm@gov.fi
Postâčujottâs:
Gollegiella-árvuštâllâmkomitea
Kulttuur- já taaiđâpolitiik uásádâh
Máttááttâs- já kulttuurministeriö
PL 29
00023 Valtioneuvosto
Kove: Ville Fofonoff / Sämitigge