Suvi Minkkinen vuoitij proonsi pasepeeivi pääččimčuoigâm vyejeetmist. Sun lâi kišto áinoo syemmilâš. Suomân láá ovdil suu puáttám kuttâ miitaal pääččimčuoigâm olympialij historjást, mut Minkkinen lii vuosmuš syemmilâš nissoonvyeittee.
Vyejeetmist kištottâlleeh vuolgâttuvvojeh máátkán ton mield, moin naalijn sii huáppumätki lii moonnâm. Jyehi kištottâllee iäru njunošân lii vyelgimist siämmáš ko tot lâi huáppumääđhi moolâst. Suvi Minkkinen vuolgij máátkán kuđâdin 50 sekuntid njunošääigi maŋa.
Minkkisii puoh pääččimuásih monnii feilâittáá. Jyehi päčimist sun pajedij saajees, uássin tondiet ko ovdláhháá vuálgám kištottâlleeh feilejii päčimist. Majemuu čuoigâmmookán Minkkinen vuolgij nubben italialii Lisa Vittozzi maajeeld. Taažâ Maren Kirkeeide luhostui kuittâg moonnâđ Minkkisiist lappâd, mut iäráseh iä peessâm aldagin suu. Ranska Lou Jeanmonnot paasij Minkkisiist 15,1 sekuntid.
Ovdebáá syemmilii pääččimčyeigee vuáitust lijjii kiergânâm kuullâđ jo 28 ihheed. Ville Räikkönen vuoitij olympiaproonsi huáppumääđhist Naganost ive 1998.
Ive 2026 tälviolympialiih uárnejuvvojeh Tave-Italia Milanost já Cortina d’Ampezzost kuovâmáánu 6.–22. peeivi. Suomâ lii vuáittám tääl kulmâ pronssimiitaal. Suomâ virgálâžžân miitaalulmen lii kuttâ miitaal.
Käldee:
– Milano-Cortina 2026: Historiallinen mitali – Suvi Minkkiselle olympiapronssia (www.olympiakomitea.fi)
Kove: Steffen Prößdorf (Wikimedia Commons)