Eero Hirvosâžân pronssi ovtâstittum normaalluáhá kištoost
Ovtâstittum normaalluáhá kišto keččui eromâš tárkká, tastko majemuu čuoigâmmohheest mitalist láin kiddâ vala kyehti syemmilii. Sunnust Eero Hirvonen vuoitij proonsi já Ilkka Herola poođij viđâdin. Vuáđu miitaalliähtun šoodâi jo luákkánjuškiimist, mast ubâ kištottâllâmive puoh pyeremuu njuškiimis finnim Hirvonen poođij lovádin. Sunjin njuškim ij lah lamaš taan täälvi nuuvtkin älkkee, já eromâš lussâd tot lii lamaš normaalluáhást. Hirvonen lâi tutâvâš njuškimsis. Sun muštâl, et sun ij lah táválávt lamaš maailm pyeremus šuávlisiijvost čyeigee, mut et sun lii kustoo ovdánâm majemui ivij. Suu mielâst koolgâi vájáldittiđ čuoigâm teknisii pele já tuše iskâđ ovdániđ šuávlist.
Herola pisottâlâi majemuu pajanem räi Hirvosii paaldâst, mut Hirvonen piergij lusis siijvost pyerebeht. Hirvonen lâi čuoigâmuási jotelumos čyeigee já Herola niäljád. Suomâ kuálmád ovdâsteijee Wille Karhumaa poođij moolân saajeest 21. Sun paasij pajeláhháá nelji miinut njunošääigist. Suu saje lâi siämmáš meid luákkánjuškim maŋa.
Suomâ ovdebâš miitaal ovtâstittum kištoost poođij Torinost ive 2006, kuás Suomâ vuoitij juávkkukištoost proonsi. Ovdebááh persovnliih mitaleh láá Salt Lake Cityst 2002, kuás Samppa Lajunen vuoitij kuohtuid persovnlijd maađhijd já Jaakko Tallus finnij siilbâ.
Käldee:
– Milano-Cortina 2026: Hirvonen otti Suomen ensimmäisen mitalin, Herola viides (www.olympiakomitea.fi)
Nubbe pronssi nisonij viestâst
Lávvárdâh (kuovâmáánu 14. peivi) puovtij Suomân nube miitaal. Tot poođij nisonij 4 x 7,5 kilomeetter viestâst. Juávkku Johanna Matintalo, Kerttu Niskanen, Vilma Ryytty já Jasmi Joensuu vuoitij proonsi. Matintalon, Ryytyn já Joensuun olympiamiitaal lâi sii vuosmuš. Niskasâžân taah olympialiih láá jo niäljádeh, já viestâpronssi lâi suu viiđâd olympiamiitaal.
– Miitaal lâi puoh čyeigei ohtsâš čááitus. Puohah porgii nuuvt pyereest ko máhđulâš, já tot lâi meid taktiik ubâ viestân. Mij ep meendugin ennuv smiettâm viestâtaktiik, pic juáháš vuolgij čuoigâđ puoh pyeremuu kištoos, já tot pijsááččij moos jo pijsáá. Tääl tot rijttái mitalân, Kerttu Niskanen muštâlij.
Matintalo já Niskanen čuoigáin vuáđu Suomâ miitaalliähtun ärbivuáválii čuoigâm oosijn. Toi maŋa Suomâ lâi viestâst nubben, 23,4 seekunt keččin Taažâst. Ryytty poođij vuárui loonootmân nubben toin naalijn, et Jasmi Joensuust lâi máhđulâšvuotâ kištottâllâđ siilbâst Ruotâ Jonna Sundlingáin. Tien kyevti nissoon kištoost Joensuu paasij nubben, mut iäru niäljádin šoddâm Saaksan lâi 21,3 sekuntid.
Käldeeh:
– Milano-Cortina 2026: Naisille viestipronssia, Leijonat tarrasi puolivälieräpaikkaan (www.olympiakomitea.fi)
– Milano-Cortina 2026: Suomen naiset olympiapronssille viestissä (www.olympiakomitea.fi)
Kove: Granada (Wikimedia Commons)