Lauri Vuorisiist korrâ kišto
Majebargâ (kuovâmáánu 10. peivi) lâi pyeremus peivi syemmiláid Milano-Cortina olympialij aalgâst, tastko sehe čyeigee Lauri Vuorinen já pääččimčyeigee Olli Hiidensalo poođijn niäljádin.
Majebargâ lâi Lago di Tesero čuoigâmstadionist ärbivuáválii čuoigâm sprinttipeivi. Veik Lauri Vuorinen poođij niäljádin, te suu peivi ij liijkágin lamaš älkkee. Rätkimkištoost sun lâi esken 27:d, já niäljádâsfinalist-uv sun peesâi het-het ovdániđ pelifinalân äigiverdidmijn puoh majemužžân kištottâllen. Pelifinalist sun kuittâg čuoigâi Johannes Hösflot Kläbo maajeeld nubben.
Finalist sáttu lâi koorâs, já mitalisteh kárgájii jo algâmääđhist iärásijn. Ounasvaara Hiihtoseura ovdâsteijee Vuorinen iiskâi peessâđ sii sáátun, mut sun paasij niäljádin.
Lauri Vuorisii niäljád saje ij lah kuittâg vala kirhoost kulluuttum.
Spriinti maŋa čielgâi, et Taažâ tiimi lâi kiävttám vuoidâmpäđe spriintijn, mii lii kieldum. Taažâst oroi lemin Aalmugijkoskâsii čuoigâmlito (FIS) lope vuoidâmpäđe kevttimân, mut tast ij lam tieđettum eres juávhoid ollágin. FIS šalligâšâi tooimâs já mieđettij, et táágu lâi tábáhtum feilâ.
Ovtâstum staatâi tiimi huolâttâssaajeest vist lâi oinum kolgosvuoidâsputtâl. Ärbivuáválij sprintij ääigi tuše cuápciuásán uážžu kuoskâđ.
Suomâ čuoigâmlitto já Suomâ olympiakomitea kuođđii tábáhtuumijn prooteest FIS tuámáráid. Toh keččih väidimstis, et FIS lii rikkom toimâinis jieijâs njuolgâdusâid já ovtviärdásii speelâ prinsiipijd. Mitalij jyehim tááhust miärádâs lii Suomâ uáinust kriittisâš, tastko Lauri Vuorisii ovddiibeln kištoost lijjii Ovtâstum staatâi silbâmitalist Ben Ogden já Taažâ mitalisteh kišto vyeittee Kläbo já pronssimitalist Oskar Opstad Vike.
Suomâ čuoigâmlitto já Olympiakomitea kuođđii prooteest lávvárdâhiiđeed, veik prooteestäigi lâi jo moonnâm. Tuođâštusah Taažâ já Ovtâstum staatâi vuoidâmtooimâin ittii esken tuorâstuv. Čuoigâm aalmugijkoskâsii kištonjuolgâdusâi 361.3.3 artikla mield prooteest nube kištottâllee teikâ suu ruustig vuástá puáhtá oovdânpyehtiđ majemustáá 15 minuttid epivirgálij puátusij almostittem maŋa.
Tastko kišto uárnejui majebaargâ 10. peeivi, te FIS uáiná, et Suomâ prooteest ij pyevti innig kieđâvuššâđ. Meiddei meriäigi väidim tohâmân tuámárij miärádâsâst lii moonnâm. Taat ličij lamaš 48 tijmed puátusij almostittem maŋa.
FIS hilgommiärádâs lii kuittâg tot, mast syemmiliih pyehtih väidiđ Valastâllâm aalmugijkoskâsii áánnumtuámustoovli CAS ad hoc ‑divisioonan, mii lii spesialistum aakuuttábáhtusâi kieđâvušmân olympialijn.
Jis prooteest mana čoođâ kuohtui enâmij tááhust, te talle Vuorisiist šadda kollemitalist. Vuorisii iäru pronssimiitaal vuáittám Viken lâi 4,84 seekunt.
Olli Hiidensalo vuod niäljád pääččimčuoigâmist
Olli Hiidensalo kiärdui Anterselva pääččimčuoigâmstadionist siämmáá čáittus ko ive 2025 MM‑kištoin: sun paajij nolláid neelji pääččimsaje normaalkištoost. Taat nollápääččim puovtij pääččimtärkkilvuođâ tiädutteijee kištoost niäljád saje.
Hiidensalo smietâdij, lâi-uv sun pettâšum vâi ilolâš ko sun oppeet poođij niäljádin. Liijká sun lâi tutâvâš jieijâs kišto joton.
Käldeeh:
– Suomi jätti virallisen protestin – Lauri Vuorinen voi nousta olympiakultamitalistiksi (www.suomiurheilu.com)
– Olli Hiidensalolta lähes täydellinen suoritus olympialaisissa (www.suomiurheilu.com)
– Suomen protesti sprintin tapahtumista on hylätty – Norjassa pöyristyttiin suomalaisten toiminnasta (yle.fi)
Kove: Sandro Halank (Wikimedia Commons)