Artemis II ‑mánudâškirdem várás rahtum rakkeet pääččim lii sirdum ovttáin mánuppoojijn njuhčâmáánun. Ovtâstum staatâi komovuotâornijdume NASA tieđettij, et rakkeet njuoskâ teestâ ääigi ittii vädisvuođah. Njuoskâ teestâst rakkeet taŋkkajui tievâ.
Ohtâ vädisvuođâin lâi avedem puáldámušpoccest, mii kiävttoo rakkeet taŋkkaamân. Ton lasseen Orion-kapselist, kost astronauteh orodeh, lijjii vädisvuođah áimutedduin. Taat váddu lâi venttiilist, mii ij toimâm olmânáál.
Meid viestâdempiergâsijgijn lijjii vädisvuođah, mondiet eennâm alne leijee pargeeh iä finnim šievnáál ohtâvuođâ kuáimásis. Já kamerahkin iä toimâm olmânáál tondiet ko Floridast lâi koolmâs.
Astronauteh lijjii jo karanteenist vuosmuu máhđulii vuolgâlaasâ lekkâsem várás, mut tääl sij láá vuod puáttám olgos. Karanteen lii taarbâšlâš, amas sij puáccáđ ovdil vuolguu. Karanteen álgá kyehti oho ovdil rekinistum pääččimääigi.
Čuávuvâš máhđulâš pääččim lii vuávájum njuhčâmáánun, mut NASA ij lah vala almottâm tärhis peivimeerijd. Puoh čuolmah kalgeh vistig čovduđ, mon maŋa lii puátimin uđđâ testam.
Artemis II ‑missio lii love peivid pištee kirdem, mast kulmâ ovtâstumstaatâlii astronaut já ohtâ kanadalâš astronaut kirdeh Mánudáá pirrâ. Taat kirdem lii valmâštâllâm Artemis III ‑mission, mon ulmen lii siäivuđ Mánudáá asan vuosmuu tove ive 1972 maŋa. Artemis III lii vuávájum ihán 2028.
Ovtâstum staatâi missio lii onnum uássin komovuotâkištoost Kiina vuástá. Kiina lii ovdláhháá almottâm, et tot vuolgât astronautijd Mánudâžân ovdil ive 2030. Ulmen lii huksiđ tohon tutkâmsajattuv.
Käldee:
– NASA Conducts Artemis II Fuel Test, Eyes March for Launch Opportunity (www.nasa.gov)
Kove: Fir0002 (Wikimedia Commons)