Sämmilâš ráppájeijee Yungmiqu adai Mihkku Heandarat Laiti makkuuttij oululijd ráp-konsertáin Oulu kulttuuruáivikaavpugive lekkâmjuuhlijn lávurduv. Tijmepele kukkosâš konsert tollui Oulu kuávdáást Rotuaari lyeve alne. Konsertist kullojii eereeb iärrás pitáh Mánnávuođa Rájes, Muital, Suohpan, Ánssásat já Cokka gávtti.
Veikâ puoh pitáh lijjii tavesämikielân, te tot ij kuittâg orroom häittidmin ulmuid, peic Rotuaari jolgâdâs tievâi párnáin já rävisulmuin, kiäh navdâšii konsertist. Ko kullein konsert maŋa koijâdui, kotemuuh kullii onne ráp-muusik vuosmuu tove tavesämikielân, te kieđah iä pajanâm ááimun meendugin ennuv.
– Lâi uáli jo suotâs lávdástiđ [kulttuuruáivikaavpugive lekkâmjuuhlijn], já lâi hävski uáiniđ, ete tääbbin láá ulmuuh pääihi alne, Laiti muštâlij aavisân tobdoinis.
23-ihásâš Laiti lii meddâl Ucjuuvâst, já sun ráppáá tavesämikielân. Sun lii lávdástâm eereeb iärrás ive 2021 Talent Suomi ‑ohjelm pelifinalist pittáin Suohpan, ive 2023 Sámi Grand Prixist oovtâst sämmilijn Jezebroin adai Jesse Ruokolaisijn pittáin Cokka gávtti sehe ive 2025 Pan-Arcticvisionist pittáin Ánssásat. Laitist lii rahtum meid dokumentelleekove Revontulten räppäri (2023).
Jieŋâkonsert Kauppatorist
Siämmáá ääigi energilijn ráp-konsertáin Oulu Kauppatorist uárnejui nubelágán konsert. Taažâ Terje Isungset já nelji eres musikkár soittii muusik jieŋâčuojânâsâiguin. Čuojânâssáid kullii jieŋâharppu, jieŋâbasso, jieŋâčaskemčuojânâsah, jieŋâruumbuh, jieŋâksylofon já jieŋâtoorvih.
Konsert tubdâmušah lijjii nahhaarlágáneh já rávháliih, aaibâs tego kullee ličij lamaš jieŋâ vyelni kuldâlmin čääsivuáláá maailm.
Isungset algâttij jieŋâmuusik rähtim ive 1999. Sun lii lávdástâm pirrâ maailm. Oulu kulttuuruáivikaavpugive lekkâmjuuhlijn Isungset skipárijdiskuin tollii kulmâ konsert. Čuávuvâžžân sii piäsá uáiniđ Oslo jieŋâmuusikfestivaalijn uđđâivemáánu 23.–24. peeivi.
Lasetiäđuh jieŋâkonsertist: tapahtumat.munoulu.fi.
Koveh: Valtteri Valkeapolku